"Tamos contentos cola respuesta de la xente", apunten dende #LluchandoPolaSoberanía

El xueves la iniciativa #LluchandoPolaSoberanía convocó una manifestación con motivu del Día de la Nación Asturiana baxo'l lema de 'Ganar la cai faciendo país'. Ésta contó col sofitu de dellos coleutivos qu'intervinieron a lo llargo de la marcha, dalgo que valoren de manera mui positiva los sos cabezaleros.

"Tamos contentos cola respuesta de la xente. Participó casi'l doble de persones que l'añu pasáu", apunten dende #LluchandoPolaSoberanía, que tien previsto un conceyu abiertu'l xueves nel Llar La Llegra, con horariu entovía por confirmar, pa valorar de manera coleutiva esti 8 de setiembre y sacar conclusiones que permitan siguir avanzando nos oxetivos de la iniciativa.

Ún de los aspeutos más destacaos de la convocatoria del Día de la Nación Asturiana ye la participación de diversos coleutivos, con intervenciones nes paraes que la marcha fixo dende'l Paséu de los Álamos hasta la plaza La Corrada l'Obispu, siguiendo un formatu utilizáu n'años anteriores y que faen que la convocatoria vaya más allá d'una demanda soberanista y se centre tamién nos aspeutos sociales: vivienda, igualdá de xéneru, universidá pública o situación de los refuxaos, ente otros. "Pa nós la soberanía ye too esto", apunte dende #LluchandoPolaSoberanía, que valoren sobre manera la presencia d'organizaciones non venceyaes al movimientu nacionalista.

La Corriente Sindical d'Izquierda (CSI), les Asamblees d'Estudiantes de la Universidá d'Uviéu, Disex Asturies, la Plataforma Antidesahucios d'Uviéu, la Ruta contra'l Racismu, Muyeres en Llucha de la CSI, Vecines escontra l'AVE, Darréu, Xunta Estudiantil Asturiana, el Llar La Llegra, Andecha Astur y Compromisu por Asturies son dalgunos de los coleutivos que sofitaron la marcha.

Pues ver toles imáxenes de la marcha del Día de la Nación Asturiana, amás de semeyes d'otros actos d'esa xornada, na nuesa galería.