El "II Premiu 25 de mayu" va pal xurista Xurde Blanco

"El ""II Premiu 25 de mayu"" qu'entrega Izquierda Asturiana (IAS), partíu integrante de la federación UNIDÁ, foi pal abogáu y miembru del Aconceyamientu de Xuristes pol Asturianu, Xurde Blanco Puente, pola so ""defensa de los derechos de los falantes d'asturianu, construyendo un referente cívicu y personal"".

Esti premiu entrégase a les persones, asociaciones o entidaes asturianes que rescamplen pola defensa de les llibertaes, los derechos d'Asturies o l'auto-organización ciudadana. Na pasada edición el galardón foi pa la Coordinadora Ecoloxista d'Asturies.

La entrega del premiu tendrá llugar esti xueves 22 de mayu en Xixón, coincidiendo colos actos que cuenta entamar UNIDÁ con motivu del 200 aniversariu de la revolución de 1808.

El xuráu del certame, presidíu por Ignaciu Llope, decidió'l pasáu vienres entrega-y el galardón, correspondiente al añu 2007, a Xurde Blanco, reconociendo asina ""la so defensa constante de los falantes d'asturianu, al traviés d'una trayeutoria que lu lleva a un compromisu personal insobornable, y que-y supunxo problemes y renuncies nel planu profesional y personal"".

Xurde Blanco Puente ye lletráu del Serviciu Xurídicu del Principáu d'Asturies y miembru del Aconceyamientu de Xuristes pol Asturianu, entidá dende la que desarrolla'l so llabor de documentación, denuncia y espardimientu venceyáu a la reconocencia xurídica de la llingua asturiana."