La "II Muestra Cultural Tolo d'Asturies" yá ta preparada

"Los próximos díes 23, 24 y 25 de mayu, Llangréu va acoyer, nel espaciu de la so estación d'autobuses, la ""II MUESTRA CULTURAL TOLO D'ASTURIES"".

Esta segunda muestra quier facer un apueste polo propio y da-y continuidá a un camín qu'entamara l'añu pasáu cola puesta en marcha de la primer feria cultural ""Tolo d'Asturies"", axuntando nun solu fin de selmana gran cantidá d'actividaes d'interés social y cultural, empobinaes a públicos de diferentes gustos y edaes.

Dende l'Ayuntamientu de Llangréu, organizador de l'amuesa, indiquen que nesta nueva edición busquen afitar la feria polo que piensen ""siguir centrándonos no propio pero tamién vamos abrinos a esperiencies culturales de fuera. Pretendemos perpasar fronteres y algamar proyección nacional ya internacional"".

Asina, cuenten esti añu cola presencia de grupos gallegos, vascos, aragoneses y bretones.

D'otru llau, el centru temáticu de la selmana será'l mundu del curdión y la so presencia na nuestra música tradicional, polo que los primeros díes de la muestra tarán dedicaos a la inaguración d'una esposición y dellos cursos venceyaos al instrumentu: la so evolución nel tiempu y el llugar, esto ye, diferentes variedaes presentes n'otres cultures y la so evolución a lo llargo'l tiempu. L'últimu día la muestra sera'l momentu de facer un homenaxe a la tradición, con una amplia presencia xeneracional, participando curdionistes vieyos y mozos cola collaboración de Xose Antón Fernández ""Ambás"".

Otres de les novedaes d'esti añu son la puesta en marcha de la I Feria del discu y el llibru n'asturianu, la esposición sobre'l traxe'l país y los puestos de venta de productos asturianos, talleres d'artesanía, animación na cai y munches coses más.
No que cinca a la música, los grupos de diferentes estilos y zones animarán l'amuesa en cuasique toles marques horaries. Rescamplen ente ellos: Dixebra, Nuberu, Los Ciquitrinos, Iñaki Diéguez Tríu, Hamon-Martin Quintet, Marful, Banda Gaites Conceyu de Llangréu, Banda Música Conceyu Llangréu, Xentiquina, Bandina tradicional A seques, Héctor Braga, Avelino Fernández Corte o Fernando Valle Roso y Marisa Valle Roso.

Pa consultar el Programa Completu"