El Farho Xixón ganó al Plasencia nun partíu con too decidío

" El Farho Xixón Baloncestu algamó la victoria nel caberu alcuentru de la lliga regular sobre'l Plasencia, pol resultáu de 96 a 82, nun partíu nel que los xixoneses nun se xugaben nada, pues ganaran o perdieran el so puestu na clasificación final nun diba cambiar.

Coles coses asina l'alcuentru sirvió pa que los xugadores locales preparan el primer partíu del ""play-off"" d'ascensu, qu'entama mañana martes y va enfrentalos col Almería en La Guía. El que si se xugaba dalgo yera'l Plasencia, pues la so derrota y la victoria del Tarragona dexábalos fuera les eliminatories, pero'l Tarragona salió derrotáu n'Huesca y ye'l que queda fuera.

Tres l'alcuentru la plantiya del Farho Xixón Baloncestu fizo públicu un comunicáu nel que denunciaba la so situación de trés meses ensin cobrar, esperando que se solucionara enantes d'entamar les eliminatories d'ascensu p'asina centrase nel oxetivu que se vien buscando dende l'entamu la temporada, que nun ye otru que l'ascensu a la LEB Oru. No referente al partíu hai que dicir que la primera parte del alcuentru foi igualada y colos estremeños delantre nel marcador pente munchos minutos, anque les ventayes yeren curties y nun diben más allá de los cinco puntos. Al descansu'l resultáu yera de 47 a 49. Nesta primera parte los árbitros foron mui protestaos pol escasu públicu qu'asistió, y la verdá ye que nun tuvieron mui acertaos, como exemplu tenemos les faltes personales, a los asturianos pitáron-yos 17 por 8 de los cacereños. Na segunda parte les coses cambiaron y al entamu del tercer cuartu los locales yá se punxeron delantre nel marcador, anque con ventayes curties, que nun diben más allá de los cinco puntos, llegándose a lo cabero del periodu con un 69 a 64.

Foi nel últimu cuartu cuando la ventaya s'enanchó, pues el Farho Xixón salió fuerte y de manes metió-yos un parcial de 13 a 2, poniendo'l marcador con una ventaya de trece puntos, 79 a 66. Dende ehí la separación nel marcador nun s'amenorgó y llegó a ser de diecisiete puntos, 86 a 79. La ventaya dába-y tranquilidá al equipu asturianu y fundió les esperances de victoria de los estremeños.

El xugador local más destacáu foi Brandon Wolfram -21 puntos, 6 rebotes y 2 asistencies- y nos cacereños Jason Blair -13 puntos, 5 rebotes y 1 asistencia-.

Ficha técnica:

Farho Xixón Baloncestu:
David Jandl (11),Curtis Bobb (12), Adrián Gacía (11), Mat Kiefer (16) y Brandon Wolfram (21). Tamién xugaron: Peter Rajniak, Chus Pined, José María Balmón,Sony Vázquez y Logi Gunnarson (9).

C. B. Plasencia Galco:
Mario Fernandes (5), Rubén Ibeas (11), Ignacio Fort (2), Jason Blair (17) y Dominick Martin (14). Tamién xugaron: Mark Zoller, Juliá Garrote (18), Enrique Suárez (13), Jorge Lledó y Miguel Ángel Conejero (2)

Árbitros:
Juan Gabriel Carpallo y José Francisco Rodríguez.

Nengún de los dos equipos tuvo xugadores eliminaos por cinco personales.

Partíu de la trentésima xornada de la Lliga Addeco LEB Plata, xugáu nel Palacio de los Deportes de La Guía cola asistencia d'unes quinientes persones.

Parciales per cuartos: 21-22, 26-27, 22-15 y 27-18.

Semeya: Sergio Iglesias "