PP y IX xúntense pa pidi-y al Gobiernu información sobre la concesión d'Autorizaciones Ambientales

"El Plenu de la Xunta Xeneral del Principáu aprobó'l vienres pasáu, colos votos a favor d'IX y PP y a la escontra del PSOE, una moción na que se pide al Conseyu de Gobiernu qu'unvie a la Cámara tola información rellacionada col procesu de concesión de les autorizaciones Ambientales Integraes a les 60 empreses asturianes que la requieran.

De la mesma manera, pídese que la Cámara refugue'l procedimientu siguíu pola Conseyería de Mediu Ambiente, al considerar que la llei ta vacía de conteníu y amás por negar la participación social nel procesu de concesión de les autorizaciones.

La moción presentada pol diputáu d'IX-BA-LV, Francisco Javier García Valledor, tuvo precedida n'anterior sesión plenaria pola entruga a la conseyera de Mediu Ambiente y Desarrollu Rural. Según indicó'l mesmu Valledor na presentación de la moción, la intervención de la titular de Mediu Ambiente valió p'amosar, ""desgraciadamente"", la falta de rigor cola qu'actuó'l gobiernu que ""fizo los deberes tarde, mal y nunca"". Asina, el diputáu d'IX-BA-LV, indicó que la conseyera Belén Fernández nun foi capaz d'informar a la Cámara de los niveles de cumplimientu de los oxetivos fixaos pola llei, n'especial los tocantes a la reducción d'emisiones contaminantes, de la xeneración de residuos y de la meyora nel usu eficiente del agua. Valledor indicó que ye precisamente d'estes cifres de les que pue depender la necesidá de construyir n'Asturies l'embalse de Caliao o la ""macro incineradora"" de Cogersa.

Dende'l PP, el diputáu Marcial González esplicó que'l so grupu comparte la visión d'IX-BA-LV sobre'l procedimientu siguíu pol Gobiernu pa conceder les autorizaciones, polo que xustificó'l votu a favor de la moción per parte del so grupu parlamentariu. González tachó de ""chapuza"" l'actuación de la Conseyería al tratar de resolver los espedientes ""l'últimu día, a toa priesa y saltando parte de la llei"".

Per parte del PSOE, la diputada Elena Díaz Palacios acusó a Valledor de tratar el procesu d'aplicación d'una direutiva ""como si fuere una semeya"" y añadió qu'esi procedimientu tien les sos peculiaridaes. Amás, Díaz Palacios añadió que Valledor basó tol so discursu nun supuestu incumplimientu llegal, y recordó que la propia conseyera esplicó nel so momentu que taben siguiendo los pasos que marca la llei."