El CAO intensifica la campaña de presiones a los miembros de la ponencia estatutaria

"Fernando Ornosa, voceru del Conceyu Abiertu pola Oficialidá, recordó na tarde del vienres la convocatoria entamada polos representantes del CAO, y en nome de les más de 200 asociaciones que lu integren pa ""facer un llamáu d'atención sobre los derechos que tenemos los ciudadanos y ciudadanos d'Asturies"".

Nesti casu l'aición será una concentración, prevista pal llunes 19 de mayu a les 8.30 hores de la mañana énte la Xunta Xeneral del Principáu, que coincide, como lo vien faciendo dende qu'entamara la reforma l'Estatutu, col aconceyamientu de los miembros de la ponencia estatutaria.

El CAO quier siguir recordando con estes aiciones que ""gran parte de la sociedá asturiana reclama la oficialidá de la llingua"", entendiendo qu'hai ""munches persones"" que ""independientemente de la so militancia política, entienden que la oficialidá ye l'únicu camín pa garantizar la sobrevivencia del idioma propiu"".

Ornosa fizo tamién una reflexón sobre les razones poles que la oficialidá tien de ser una condición indispensable, declarando que ""la oficialidá ye la única manera de promocionar la llingua en condiciones, la única vía que val pa normalizar, y amás ye la opción qu'esiste dientro del marcu llegal español, la Constitución Española, pa protexer los derechos universales de los falantes, que nel casu asturianu y a pesar de tar nel gobiernu un partíu que nun descansa a la hora de falar de derechos, tán siendo consultaos cada día"", y entrugándose ""¿O acasu los ciudadanos d'Asturies tenemos que siguir siendo trataos como ciudadanos de segunda categoría en comparanza con otros que tamién gocen de la suerte de tener llingua propia reconocida como llingua oficial?"".

No que cinca a les próximes campañes que cuenta entamar el Conceyu Abiertu pola Oficialidá, dientro del marcu de la ponencia estatutaria, afirmó que piensen intensificar les sos aiciones con nueves campañes mediátiques ""que van valir pa demostrar a les clares cómo la sociedá asturiana ve con bonos güeyos que s'acabe d'una vez cola desigualdá na que viven los nuestros idiomes propios, l'asturianu y el gallego-asturianu""."