Castilla y Lleón dedica cero euros al enseñu del lleonés

El conseyeru d'Educación de Castilla y Lleón, Fernando Rey, xustifica la partida de cero euros pa la llingua lleonesa con una supuesta falta de demanda. El gallegu, mentes, recibirá 500.000 euros en dos años pa poner clases n'El Bierzu y Senabria.

Mariano Santos, d'Unión del Pueblo Leonés (UPL), entrugó por esta situación ayeri nel Plenu celebráu nes Cortes, a lo que Rey respondió que la falta de perres destinaes al enseñu del lleonés na comunidá autónoma vien por una falta de demanda de los centros y l'ausencia de profesoráu, dalgo que dixo nun asocede col gallegu, con demanda n'El Bierzu y Senabria. D'igual forma, el políticu independiente del Gobiernu popular dixo defender y valorar al idioma propiu del so territoriu de nacencia, pero quitó la categoría de llingua al mesmu alegando que'l gallegu sí tenía reconocimientu xurídicu como tal.

Pela so parte, Santos criticó la falta de proteición al lleonés nos más de 30 años de "autonomía artificial" de Castilla y Lleón. La pretensión d'UPL ye que l'idioma forme parte del currículu educativu.