Valdés noma a Nené Losada "Fía Predilecta"

"La poeta asturiana Nené Losada Rico será nomada esti sábadu 17 de mayu, nun actu que tendrá llugar nel salón d'actos del Institutu ""Carmen y Severo Ochoa"" de L.luarca, fía predilecta del conceyu de Valdés, conceyu de nacimientu y residencia de Nené y al que-y dedicara los sos populares ""Cantares Valdesanos"".

Con esti actu l'Ayuntamientu de Valdés quier reconocer, en Plenu Estraordinariu, el valir humanu y lliterariu d'una de les sos vecines más ilustres, siendo amás, una de les poetes más sobresalientes de la llingua asturiana na so variante occidental.
Nené Losada Rico naz en L.luarca nel añu 1921. Güérfana dende mui neña treslládase al pueblu valdesanu de San Féliz, na parroquia de Trevías, onde vivirá con so güela hasta que casa con Antonio Martínez García-Vidal, col que tendrá dos fíos. Tres perder al so maríu y a ún de los fíos, torna a L.luarca, villa na que sigue viviendo anguaño.

Escritora instintiva y autodidacta, nun será hasta 1992 cuando asoleye'l so primer poemariu ""Cantares Valdesanos"", al que siguirán ""Entre apigarzos"" (1997) y ""El nome de las cousas"" (2001), dambos d'Ediciones Trabe. Esta mesma editorial, xunto cola Fundación Fernández Lema, espublizará nel añu 2005 la so obra ""Poética en castellano"", y dos años dempués L'Atenéu Obreru de Xixón allumará l'antoloxía ""Fueyas que reverdecen"", na coleición Tiempu de Cristal.

Nené Losada tien recibíos abondos premios. Ente ellos rescampla l'Urogallo 2000 entregáu pol Centru Asturianu de Madrid, o la medaya de plata del Principáu d'Asturies que-y conceden nel añu 2005. Asina mesmo, la organización del alcuentru lliterariu Arribada, alcordó entrega-y el premiu Timón del añu 2007 pola so trayeutoria vital y lliteraria.

A veces sueño
sueño que tengo
na mio mano grande
la manina tuya
pequena, pequena,
y aprieto la mía
nun quiero qu'escape de nuevo
pero al despertame
alcontro la mano vacía
la tuya, pequena
tan nidia, tan nidia
como siempre quedouse nel sueño
porque sabe que vou
a suañar outro día

Nené Losada Rico, ""Ente Apigarzos"". Ediciones Trabe. Uviéu, 1997."