La Ñora, zarrada pola apaición d'una mancha de contaminación na mar

Desconozse l'orixe de la mesma, pese a que nun primer momentu apuntóse al emisariu d'agües residuales de Peñarrubia.

L'Ayuntamientu de Villaviciosa, conceyu onde ta situada la sablera de La Ñora, señalaba na mañana d'ayeri a esti puntu onde sal a mar adientro toles agües residuales del este de Xixón por falta de tratamientu al tar paralizada la depuradora d'El Pisón polos tribunales. Sicasí, pela tarde, l'acaldesa de Xixón, Carmen Moriyón, afirmaba que nun  había nada que confirmara que la mancha apaecida pela mañana tuviera el so orixe nel emisariu, revisáu precisamente la selmana pasada por operarios de la Empresa Municipal d'Agües (EMA).

La contaminación na mar provocó una alarma grande ente los bañistes nuna xornada de presencia masiva nes playes asturianes. Ésta podía vese bien dende la costa y provocó que munches persones desistieran de bañase. Esta mañana ta previsto que'l Conceyu de Xixón tome muestres d'agua cola fin de determinar l'orixe de la mancha.