La UNED incluye l'asturianu na so ufierta d'idiomes a distancia

"El direutor de la UNED n'Asturies, Mario Menéndez, anunció esti xueves, nuna rueda prensa celebrada nel conceyu de Xixón, la intención de la institución académica d'introducir la enseñanza d'asturianu, nun nivel básicu, a partir d'ochobre.
La llingua asturiana integraráse asina nel Centru Universitariu d'Idiomes a Distancia, como títulu propiu de la UNED, lo mesmo que les otres llingües del estáu. Menéndez apuntó que los idiomes que s'imparten cuenten cola homologación de la Escuela Oficial d'Idiomes dende esti añu. Tamién señaló la intención d'incorporar nuevos niveles d'enseñanza del asturianu en próximos cursos.

Amás adelantó que, per primer vez, van ufiertase cursos de branu na ciudá, amás de d'un cursu nel centru penitenciariu de Villabona, empobináu a presos y a alumnos y alumnes esternos. Nesti sen indicó que se trata d'una esperiencia nueva que la UNED va poner en marcha n'Asturies y dalgunes otres comunidaes. Según dixo, forma parte del llabor de promoción social que desarrolla la institución, amosando'l so deséu de que pueda siguir nel futuru.

Menéndez indicó que la matrícula pa los cursos de Xixón y Villabona ta yá abierta y que l'únicu llímite de places ye l'aforu de los espacios. Cada cursu va reconocese con una carga llectiva de dos creitos, si ye de cinco díes, y d'ún, si ye de tres. Los alumnos va tener de ser mayores de 16 años.

Los cursos que van impartise en Xixón son Del vapor al AVE. El ferrocarril n'España, nel que s'analizará la repercusión d'esti mediu de tresporte; La intriga na Lliteratura, en collaboración cola Selmana Negra y cola participación d'escritores como Clara Sánchez, Paco Taibo II o Lorenzo Silva; Autismu: nueves perspectives téuniques, metodolóxiques y educatives; Recursos educativos abiertos: la web social na anovación educativa; y Arqueoloxía castreña n'Asturies: novedaes y propuestes metodolóxiques, qu'inclúi una visita a la Campa Torres.

Menéndez tuvo acompañáu na rueda prensa de l'alcaldesa de Xixón, Paz Fernández Felgueroso, quien destacó la importancia d'estos cursos, a los qu'asisten alumnos de fuera d'Asturies y que formen parte tamién de la ufierta del branu de la ciudá. La UNED cuenta n'Asturies con unos 5.000 alumnos - 4.000 d'estudios regulares -, de los que 1.500 son de Xixón."