Marcha al Pozu Funeres pa esti sábadu

Cuatru Centros Sociales autoxestionaos de Asturies cordinen xuntos una Marcha al Pozu Funeres con un homenaxe a la llucha antifranquista. Los colectivos son La Xusticia y La Semiente de la cuenca del Nalón y Sestaferia y La Llegra de Xixón y Uviéu respectivamente.

Ye la cuarta vez que se realiza esta marcha que n'anteriores ocasiones taba enmarcada dientro de los Alcuentro Alternativos de Bimenes y que yá non se realicen. Va haber una marcha que sala dende Fayacaba nel conceyu de Bimenes a les 11:50 y otra dende la Baúa nel de Llaviana a les 12:00h.

L'actu d'homenaxe va ser al rodiu les 13:00h del mediu día al pie del Pozu Funeres, y nel va intervenir el profesor d'hestoria ya investigador de la memoria histórica Pablo Martinez Corral. La música tamién va tener un requexu pequeñu de la mano d'Arma X y Fran Rubio, y la cantautora May.

La idea de los organizadores ye la de contribuyir al restu d'actividaes desenvueltes por otres organizaciones empuestes a dignificar la memoria histórica. Consideren que ye importante caltener viva la memoria de lo asocedío, una memoria qu'afirmen "sigue apatayada, secuestrada y soterrada nes cunetes y fueses comunes".

Los convocantes quieren facer esti actu dende la pluralidá y la independencia de partíos políticos, porque "somos persones de distintos enclinos filosóficos ya ideolóxicos, pero con un sentir común, como ye'l merecíu respetu a aquelles persones que sufrieron la guerra, la represión y la persecución por lluchar contra la tiranía y la dictadura, por resistir al fascismu y defender el bien común". Consideren que "la firmeza d'aquelles persones ye necesaria más que nunca, yá que nun podemos vivir con pasividá a les inxusticies qu'afaren la humanidá, que ye necesariu un compromisu como aquel pa faer frente a la inxusticia, a la desigualdá, al racismu, a la esplotación llaboral, a les sos guerres mercantilistes, al colonialismu, al espoliu del planeta, al fascismu…". Atalanten tamíen que'l llugar escoyíu ye'l más afayaizu pa persones de distintes sensibilidaes puedan facer un merecíu homenaxe a les xentes del pasáu, a les del presente y a les del futuru, siendo un bon llugar pa "confraternizar y caltener viva la memoria del ayeri colos güeyos puestos ne mañana".

El Pozu Funeres ye un llugar cargáu de simbolismu tocantes a lo que ye la represión fascista n'Asturies. Nesti llugar de Peñamayor nel conceyu de Llaviana fueron asesinaos nel añu 1948 nueve, anque hai versiones que cuenten más de veinte,  millitantes antifranquistes.