La torna al asturianu de "La Odisea" preséntase n'Uviéu

"Esti xueves 15 de mayu a les 12.00 hores, va presentase la torna al asturianu de la obra d'Homero ""La Odisea"", nuna interpretación de la que ye autor Xosé Gago. L'actu, que tendrá llugar nel Salón de Graos de la Facultá de Filosofía, ta organizáu pol Seminariu de Filoloxía Asturiana y el Seminariu d'Estética y Semiótica de la Universidá d'Uviéu.

El llibru, presentáu nuna guapa edición de la que ye responsable Ediciones Trabe, recueye los 12 primeros cantos de la obra d'Homero nuna torna que respeta la estructura orixinal en versu, nun rexistru mui averáu al ritmu de la prosa narrativa.
Xosé Gago nació en Turón nel añu 1957 y vive en Cataluña dende finales de los 70. Profesor de Griegu na Universitat Oberta de Catalunya, ye responsable de les tornes al asturianu de ""Poemes y fragmentos"" de Safo, espublizáu pola Academia de la Llingua Asturiana y ""Venticinco poemes"" de Konstantinos Kavafis, asoleyáu por Alvízoras Llibros en 1989.

Cola torna al asturianu del que ye, xunto cola Iliada, el poema épicu con más trescendencia pa la cultura occidental, Gago da un pasu más na dignificación del asturianu al traviés del trabayu minuciosu y percuidáu de cunta-y a la llingua asturiana les aventures d'Ulises, rei d'Ítaca."