La plantiya de Naval Xixón movilízase pa pidir el saniamientu financieru del astilleru

"Trabayadores de Naval Xixón tornaron a movilizase pa pidir una mayor carga de trabayu y una solución pal astilleru énte l'anunciu de pieslle previstu pal mes d'ochobre.

Los manifestantes prendieron una barricada de neumáticos na entrada al acuariu y ficieron un percorríu peles cais de Mariano Pola, Avenida Juan Carlos I y Plaza de Máximo González, enantes de tornar pa les instalaciones navales. el grupu llevaba una pancarta na que podía lleese ""Principáu, Pymar, solución barcos yá"".

El secretariu del comité d'empresa, Hermógenes García, díxo-yos a los medios de comunicación que la so intención yera dir a manifestase énte la Casa'l Conceyu, pero que decidieron cambiar los sos planes pola mor de la concentración de condena pol atentáu d'ETA. García señaló que la única solución que ven ye la contratación de más barcos y el saniamientu financieru de la empresa, anunciando l'endurecimientu de les movilizaciones con nueves protestes.

Al empar reconoció que'l futuru del astilleru ye ""negru"" y apuntó la voluntá de centrase en Naval Xixón yá qu'hasta'l momentu naide presentó'l plan industrial de Juliana, que contempla la posibilidá d'incorporación de 44 trabayadores. Amás, encamentó a la empresa a buscar una solución pal astilleru, argumentando que ""lo que nun vamos permitir ye que s'eche a la cai a los trabayadores"".

El voceru avanzó, al mesmu tiempu, el próximu aconceyamientu del comité con Pymar, col Ayuntamientu de Xixón y cola Conseyería d'Industria."