Llaviana antróxase pal Descensu Folklóricu del Nalón

Esti sábadu va vivise en La Pola Llaviana una edición nueva del Descensu Folklóricu del Nalón, que va principiar de madrugada con un conciertu de Los Berrones. Les fiestes de San Pedrín de la Cueva, cola so misa n'asturianu del domingu, San Timoteo en Ḷḷuarca y la del Asturcón son otres de les munches cites previstes esta fin de selmana.

Les carroces yá tán preparaes en La Pola Llaviana pa participar mañana nel XLIX Descensu Folklóricu del Nalón y los participantes peracaben los sos disfraces pa una xornada festival que tien el ríu como protagonista. A les 15.30 hores va principiar el desfile dende'l centru de la villa hasta la Ponte d'Arcu pa proceder a baxar el Nalón, sobre les 18.30 hores, hasta la Ponte La Chalana onde toles peñes y espectadores van celebrar la merienda.

Sicasí, la fiesta va comenzar esta madrugada con un conciertu de Los Berrones, previstu pa medianueche. Mañana, la orquesta Jerusalén va encargase d'amenizar la verbena.

San Pedrín de la Cueva

En Sariegu celebráse dende mañana y hasta'l martes les fiestes de San Pedrín de la Cueva. Esti festexu, el más popular del conceyu, destaca por celebrar una misa en llingua asturiana, que va tener llugar el domingu al meudía y na que participa'l Coro Santiaguín tres la baxada del santu a la cueva nun pasucais amenizáu pola Banda Gaites Llariegu.

Mañana van entamase xuegos infantiles dende les 17 hores y, tres el 'Festival Coral en la Cueva', a les 19.30 hores, va haber verbena cola orquesta D-Liaer y DJ Laruelo. Otra cita destacada va ser el XLIII Motocross Internacional San Pedrín de la Cueva, que va tener llugar el llunes 17 hores. Nesa mesma xornada, de magar les 23 hores, va desendolcase la Nueche Folk, que protagoniza Tuenda. El martes, mentes, va ser el día grande, cola presencia de les orquestes Tango y The Players tres el gran desfile de carroces.

San Timoteo

Ḷḷuarca lleva de folixa tol mes d'agostu,  pero esti llunes ye'l día más esperáu por tolos vecinos: San Timoteo. Un pasucais al Campu San Timoteo pa visitar al santu na capiella y canta-y el 'Cumpleaños feliz', al rodiu de les 12.30 hores, abrirá la romería, una de les más multitudinaries del país. La nueche enantes, mentes, celebráse'l llanzamientu de los fueos artificiales y la gran verbena, qu'esti añu cuenta coles orquestes Panamá y Dominó.

Pa güei y mañana tamién tán previstes una bon piñu d'actividaes na villa, con protagonismu colos conciertos de La Edad de Oro del Pop Español y Los Junior, y les orquestes Distrito Xoven y Anaconda, de manera respeutiva.

Fiesta l'Asturcón

Na mayada d'Espineres va tener llugar mañana la Fiesta l'Asturcón, dedicada a esti caballu autóctonu. Los deportes tradicionales van abrir los actos a les 10.30 hores, pa depués siguir cola misa de campaña cola participación del Coro Manín. La llectura del pregón, a cargu del periodista Sebastián Álvaro Lomba, creador del programa 'Al filo de lo imposible', va ser a les 13 hores.

Pela tarde llega los más esperao de la fiesta piloñesa: la marca d'asturcones nacíos n'El Sueve y la doma de potros.

Fiesta de la Sidra Natural en Xixón

Anque los actos más importantes van desendolcase la fin de selmana viniente, la Fiesta  de la Sidra Natural va comenzar en Xixón mañana cola inauguración del Mercadín de la Sidra y la Mazana nos Xardinos de la Reina. L'horariu d'apertura de los puestinos va ser de 17 a 00 hores, y de 11 a 00 hores, el restu de díes, cola esceición única del domingu 28, cuando va pesllar a les 22 hores.

XII Encontro de Portadores de Tradición Oral

San Tiso d'Abres ta celebrando estos díes la so XXVIII 'Semana Cultural', que güei entama la 'Fiesta del Veraneante' con una cena y una verbena col Dúo Areal. Yá de domingu, tres la paella prevista pa la xinta, va celebrase'l XII Encontro de Portadores de Tradición Oral.

Semeya de la organización del Descensu Folklóricu del Nalón.