La UE reclama-y a EE.XX l'abolición de la pena de muerte

"La Unión Europea reclamó-y a Estaos Uníos que vuelva a establecer el protocolu de suspensión de la pena de muerte ""en tol país"" de cara a ""abolila nun futuru"" y llamentó que, pese a que los embaxadores de la UE acreditaos en Washington pidieron la suspensión de la pena capital pal condenáu William Lynd énte'l Tribunal Supremu, l'estáu de Georgia completó la execución el pasáu 6 de mayu.

La presidencia de la UE, en nome de los 27, llamentó asina mesmo, al traviés d'un comunicáu, que la sentencia del Tribunal Supremu d'EE.XX del pasáu 16 d'abril permita l'aplicación de la inyeición lletal al condergáu Ralph Baze, que recurrió la so condena a muerte nel estáu Kentucky, ""termina cola suspensión, que permaneció en tol territoriu d'Estaos Uníos"", hasta'l pasáu mes d'abril.

La Unión Europea reafirmó la so ""postura contraria a la pena de muerte en toles circunstancies"", y defendió'l so oxetivu de llograr ""una suspensión global"" de la pena capital por considerar que la so eliminación ""ye fundamental pa protexer la dignidá humana y pal desarrollu progresivu de los Derechos Humanos"".

Amás sorrayó que ""cualesquier error xudicial na aplicación de la pena de muerte representa una perda de vida irreparable y irreversible"", y recalcó que ""nengún sistema llegal ta llibre d'errores"", como tampoco ""hai prebes fiables de que la pena de muerte proporcione un valor añadíu en términos de llucha escontra potenciales criminales""."