Abiertu'l plazu pa presentar proyeutos pal Premiu Nuevos Realizadores del Principáu d'Asturies

L'Institutu Asturianu de la Mocedá ta acabante de convocar el Premiu Nuevos Realizadores del Principáu d'Asturies, encuadráu nel XXVII Culturaequí. Hasta'l 14 d'ochobre ye posible presentar proyeutos pa curtiumetraxes n'asturianu o castellanu.

El programa Culturaequí 2016 engloba delles aiciones culturales y artístiques dirixíes a mozos y moces nacíos n'Asturies, residentes nel país o emigrantes descendientes hasta de segundu grau con una edá non superior a los 35 años a 31 d'avientu del 2016. No que se refier al Premiu Nuevos Realizadores del Principáu d'Asturies, trátase d'un concursu en collaboración col Festival Internacional de Cine de Xixón (FICXixón) qu'inclúi un premiu en metálico de 5.000 euros, amás del estrenu de la obra ganadora nel FICXixón del 2017.

Los trabayos presentaos, con un llargor máximu de 25 minutos, tendrán d'incluyir guión, presupuestu, plan de rodaxe, memoria de direición, plan d'esplotación y formatu d'exhibición, cualquier fonte de financiación adicional, acreditación, etc. Tola documentación ha d'entregase enantes del 14 d'ochobre nel Rexistru Xeneral de la Conseyería de Presidencia y Participación Ciudadana o, al traviés de corréu certíficáu, a les dependencies del FICXixón.