La meyora del saniamientu del Baxu Nalón sal a llicitación

Van beneficiase vecinos de Salas y Pravia.

La Xunta de Saniamientu d'Asturies sacó ayeri a llicitación les obres de meyora del sistema públicu de saniamientu del Baxu Nalón, que con un presupuestu de 1.073.170 euros va beneficiar a 224 habitantes del conceyu de Pravia y a más de 2.000 de Salas. Esti proyeutu, que va apurrir tamién saniamientu y depuración a delles poblaciones entemedies de la cuenca del ríu Nonaya, va actuar sobre los cinco colectores interceptores que conducen les agües residuales hasta la depuradora asitiada en Sotu'l Barcu. Conforme a les condiciones publicaes nel Boletín Oficial del Principáu d'Asturies (BOPA), cuenta con un plazu d'execución de venti meses y va poder recibir ufiertes hasta'l 12 de setiembre.

Los cinco colectores interceptores recueyen les agües de los núcleos pertenecientes a les cuenques de los ríos Narcea y Nalón, onde la gran mayoría d'habitantes concéntrase en Corniana (Salas), Pravia y L'Arena (Sotu'l Barcu), y Muros y San Esteban (Muros). Hasta la fecha, les poblaciones de Lluerces, Repolles, Courias, Quinzanas, Bances, Santianes y Los Cabos, nel conceyu de Pravia, cuenten con saniamientu, pero nun s'integren nel sistema públicu al nun cuntar con alliviaderos qu'apurran el control de los caudales d'incorporación al colector principal.

El núcleu de Corniana, en Salas, tamién tien pendiente la incorporación al colector principal. Amás, va ameyorase la operatividá hidráulica de los alliviaderos de Forcinas, Pravia, Agones, San Esteban, Pontigo, Los Molinos y Sotu'l Barcu, y va aumentase la capacidá de los bombeos de Courias y El Visu.

Nueve alliviaderos

Pa satisfaer estes necesidaes, el proyeutu prevé la construcción de nueve alliviaderos, mesmo que la sustitución de les compuertes existentes por válvules de regulación tipo vórtice nos alliviaderos de Forcinas, Pravia, Agones, San Esteban, Pontigo, Los Molinos y Sotu'l Barcu. La empresa axudicataria sustituirá les bombes actuales por otres de mayor potencia, capaz d'estrayer el caudal de salida nes estaciones de Courias y El Viso, y realizará dos bypass del colector interceptor pa evitar que les agües entren nos alliviaderos de Pravia y Sotu'l Barcu. A lo último, van reparase les infiltraciones nel interceptor y va conectase el saniamientu de Corniana al interceptor del Baxu Nalón.