La Oficina de la Llingua de Xixón presenta'l xuegu "¿Qué hai pa comer, güeli?"

"La Oficina Municipal de la Llingua de Xixón acaba presentar el xuegu ganador nel II Concursu ""Vas Velo"" (trebeyos pal aula), nel que participen los alumnos y alumnes d'Enseñanza Secundaria qu'estudien llingua asturiana nos institutos del conceyu.

L'oxetivu d'esti concursu ye favorecer la ellaboración de materiales didáuticos, per parte del alumnáu de secundaria, que seyan útiles pa fomentar la práutica oral y escrita en llingua asturiana y que puedan tener una aplicación na clas, al tiempu que seyan entreteníos y prestosos.

Los autores del trabayu ganador d'esta segunda edición del concursu fueron Brenda Díaz Rodríguez, Noelia Expósito Marqués, Jonatan Fernández Pendones, Manuel Ángel Fuertes Bernardo, Abel García Nicolás, Irene García Pérez y Sandra González Rosado; toos ellos alumnos de 4u de la E.S.O. del I.E.S. Padre Feijoo.

El xuráu, formáu por Manuel Gonzalez García, xefe del Departamentu de Programes Educativos de la Fundación Municipal de Cultura de Xixón; Mª Xosé Rodríguez López, responsable de la Oficina Municipal de la Llingua del Ayuntamientu de Xixón; Urbano Rodríguez Vázquez, representando a l'Academia de la Llingua Asturiana; Fernando Padilla Palicio, coordinador d'Enseñanza de Llingua Asturiana de la Conseyería d'Educación del Principáu d'Asturies; y Carmen Rúa Moran, asesora de la Conceyalía de Cooperación, Cultura Tradicional y Política Llingüística del Ayuntamientu de Xixón; valoró nel trabayu ganador ""Qué hai pa comer güeli"", la so calidá y orixinalidá.

Asina mesmo consideróse que se trataba d'un xuegu que favorez l'usu y afitamientu del pallabreru rellacionáu cola comida, al tiempu qu'ufierta la posibilidá de trabayar la espresión oral en distintes situaciones de comunicación y plantega cuestiones que posibiliten el conocimientu de la historia, de les costumes y vezos y del patrimoniu cultural asturianu en xeneral.

Na edición anterior resultaron ganadores los institutos Doña Ximena y Emilio Alarcos, colos xuegos ""El Coríu"" y ""El Xuegu de la Llingua"", respeutivamente.

El premiu pal trabayu ganador consiste na edición del mesmu per parte de la Oficina Municipal de la Llingua de Xixón. Amás, la clase de los/es alumnos/es ganadores dirá de viaxe a Miranda do Douro nun intercambiu cultural pa conocer la llingua, costumes ya historia d'esta zona de Portugal."