Coleutivos ecoloxistes d'Avilés denuncien los "atentaos ambientales na ría"

"El grupu d'Ornitoloxía Mavea y el Coleutivu Ecoloxista d'Avilés criticaron esti martes, al traviés d'un comunicáu conxuntu, ""l'atentáu ambiental"" que sigue produciéndose na ría d'Avilés.

El coleutivu recordó que'l pasáu 25 d'abril denunció énte L'Ayuntamientu d'Avilés y el Gobiernu del Principáu d'Asturies los daños de les obres de remocique de la rasa asitiada énte'l Parque Lobos, llevantada pal depósitu de material de Tadarsa y que ""taba produciendo vertíos na ría ensin autorización"".

Nesti sen, la organización sorrayó que la rempuesta del Ayuntamientu foi que les obres ""nun teníen la obligatoria llicencia y que taben totalmente prohibíos los vertíos na ría"". ""Güei comprobamos"" diz el comunicáu ""que sigue enllenándose con más tierra la ría y la zona onde tán los travertinos"".

El coleutivu recordó que los travertinos tán clasificaos como ""hábitats prioritarios a protexer na rede 'Natura 2000' y ye'l más singular de los siete habitats prioritarios presentes na ría d'Avilés"". Amás esplicaron que según la Universidá d'Uviéu esta formación xeolóxica ye la única n'Asturies que ta presente na bocana d'un ríu, y ye mui raro que se forme en zones de costa.

Poro, dende'l grupu d'Ornitoloxía Mavea y el Coleutivu Ecoloxista d'Avilés soliciten-y al Ayuntamientu la paralización de les obres alvirtiendo que ""de siguir asina pue entendese qu'hai una dexadez de funciones manifiesta y podría tratase d'un delitu alministrativu"". Pal coleutivu ""esti nuevu atentáu ambiental pon otra vuelta sobre la mesa la falta de siguimientu del impactu ambiental de delles obres que se faen ensin tener en cuenta les consecuencies ambientales que se producen direutamente o d'un mou asociáu y que son consentíes nesti casu pol Ayuntamientu que fai la vista gorda"" fina'l comunicáu."