L'Audiencia Nacional echa p'atrás el procesamientu de los militares americanos pola muerte de Couso

"La Seición Segunda de la Sala de lo Penal de l'Audiencia Nacional alcordó esti martes revocar la sentencia del xuez Santiago Pedraz de procesar a trés militares norte americanos, presuntamente implicaos na muerte del cámara de Telecinco José Couso en Bagdad, el 8 d'abril de 2003.

A lo llargo de la vista d'apellación, celebrada'l pasáu 22 d'abril, l'abogáu de la familia, Enrique Santiago, alegó que ""hai motivos a esgaya pa facer la investigación"" y acusó al Ministeriu Públicu de ""nun querer saber nada de la xurisdicción del Tribunal Supremu"", qu'ordenó la reapertura de la causa n'avientu de 2006.

Asina, el tribunal, que taba formáu por Ángel Hurtado, en calidá de presidente, Fermín Echarri, y Ricardo Prada, en calidá de ponentes, camienta que les prebes presentaes nun son bastantes como pa siguir col procesamientu. Na vista d'apellación discutióse'l recursu presentáu pola propia Fiscalía escontra l'autu de procesamientu del xuez d'Instrucción, Santiago Pedraz. Nes sos alegaciones el representante del Ministeriu Públicu sorrayó que ""los militares nun teníen intención d'acabar cola vida de Couso"", según informaron fontes fiscales.

Amás, anque almitió que l'Audiencia Nacional ""ye competente pa investigar los crímenes de guerra, nesti casu, los fechos carecen de la carga de dolor que recueye'l conveniu de Xinebra como requisitu pa llevar a cabu la investigación"". ""Nun ye un crime de guerra nin un asesinatu"", afirmó l'abogáu de l'acusación, polo que solicitó l'archivu definitivu de la causa.

No tocante a la familia, el representante de los hermanos del cámara, Enrique Santiago, esplicó que ""los argumentos del fiscal nun tienen fundamentu dalu"", yá que'l proyeutil qu'acabó cola vida del cámara foi resultáu de ""un ataque indiscrimináu escontra'l que sabíen que yera l'hotel nel que s'agospiaben los periodistes, espaciu protexíu internacionalmente"". Nesti sen la familia piensa recurrir la decisión énte'l Tribunal Supremu como yá ficieron cuando l'Audiencia Nacional decretó l'archivu de la causa."