La Xunta califica de "propies d'un demagogu irresponsable" les declaraciones del secretariu d'organización de la FSA

"La Xunta pola Defensa de la Llingua Asturiana calificó les declaraciones del secretariu d'organización de la FSA, Jesús Gutiérrez, nes que comparaba la oficialidá col fechu de ""creer o nun creer en Dios"", como ""propies d'un demagogu irresponsable"".

La organización, que-y respondió al dirixente socialista al traviés d'una nota prensa, pidió amás que l'alderique sobre la oficialidá del asturianu y el gallego - asturianu torne a la ""sienda de la normalidá y al campu de los derechos ciudadanos"".
La Xunta afirma que ye ""una argumentación"" propia d'un demente, y entruga-y a Jesús Gutiérrez si ""cree nos derechos de los asturianos o nun cree nellos, y si cree que los falantes de la llingua asturiana tienen de siguir teniendo la suerte de ser ciudadanos de segunda"". Asina mesmo niega qu'exista la ""llinia d'obligatoriedá de la que fala la FSA"". ""Ye una pantasma cola que se pretende crear duldes nuna población mayoritariamente favorable a la reconocencia de los derechos llingüísticos, como amuesen toles encuestes"". ""Cualquier sociedá avanzao, cualquier comunidá d'anguaño, respuende con eficacia y ensin ambaxes faciendo encaxar nel so marcu llegal a la llingua que-y correspuende"" afirma'l comunicáu.

Pa la Xunta la solución ye ""cenciella y vien de reconocer que los asturianos y asturianes nun somos de segunda, asumiendo cómo son trataes otres llingües propies n'otres comunidaes del estáu, colos mesmos partíos políticos con representación que los que tien Asturies"".

Dende la organización de defensa de la llingua sorráyase que l'alderique de la obligatoriedá ye ""falsu ya interesáu, sobre too dientro una sociedá na qu'obligaciones y derechos van siempre garraos de la mano"", al empar que conviden a los partíos políticos con representación y a la so militancia a que ""garanticen que nel próximu estatutu l'idioma asturianu va ser oficial, persabiendo qu'ello ye un puntu de partida, non fin nelli mesmu, del respetu a los derechos fundamentales nos que toos y toes creemos y una manera de caltener pa xeneraciones futures un patrimoniu cultural amenazáu"""