Areces fai un apueste pola financiación autonómica "común"

"El presidente del Principáu d'Asturies, Vicente Álvarez Areces, fizo públicu'l so apueste por un sistema de financiación autonómica basáu nes premises de lo ""común y la solidaridá"" territorial, ensin aceptar ""imposiciones"" que vengan d'otra comunidá, en referencia a Cataluña.

En declaraciones a los medios, demientres la so visita a la Feria del Llibru d'Uviéu, Areces aseguró que la premisa de solidaridá territorial va ser la qu'Asturies va defender nesta reforma. Una reforma que, según el presidente ye ""evidente"" que ""nun cuerre tanta priesa"", como dalguna comunidá ""tenta pone-y"".

Pal presidente del Principáu, la reforma del sistema de financiación tien de facese baxo la ""racionalidá"" y buscando ""l'acuerdu ente toos"". No tocante a la intención del presidente catalán, José Montilla, de negociar la financiación de manera billateral col Gobiernu central, Areces manifestó nun tar d'alcuerdu cola midida. ""Ye respetable en cuantes que trata de defender los intereses de la so comunidá, pero hai otres que tenemos otros criterios y, ensin dulda trataremos d'adautalos dialogando nel senu del propiu PSOE"", señaló'l presidente del Principáu d'Asturies.

Nesti sen, el presidente asturianu apuntó hacia un ""diálogu serenu"" que permita armonizar les distintes posiciones. ""Pa llegar a alcuerdos como se llegó nel modelu anterior"", declaró Areces. Pal presidente del Principáu'l sistema de financiación tien de ser ""dialogáu"" y ensin aceptar ""imposiciones"" que vengan d'una comunidá. ""Cada comunidá pue tener el so propiu puntu de vista, pero les demás tenemos que poner enriba la mesa la nuesa propia visión"".

Asina, Areces afirmó tar seguru de que ""con sentíu de la responsabilidá"" va poder adautase esi marcu ensin provocar ""escesives tensiones"". Según el presidente del Principáu, los servicios públicos esenciales ""cada vez aumenten más"" los sos costos, polo que ye necesario actualizar la so financiación, la ""suficiencia dinámica"". ""Nós siempre reclamamos qu'esa revisión se faiga en foros comunes, y el conseyu de política fiscal y financiera ye'l muérganu afayadizu pa facelo"", aseguró Areces."