La sidra de Mazana Seleccionao celebrará esta selmana la primer Preba

"La sidrería Villaviciosa, asitiada na cai Gascona d'Uviéu, va acoyer el próximu martes 13 de mayu la primer ""Mesa de Cata"" de la collecha 2007 de sidra de Mazana Seleccionao - sidra ellaborao con 20 variedaes de mazana 100% asturiana y comercializao con esti certificáu de calidá por Sidra Trabanco, La Nozala, Muñiz, Peñón, El Gobernador y Foncueva -.
A les 19.30 hores perconocíos prebadores de sidra asturiana van dase cita pa tastiar les primeres pipes del añu y da-yos les sos calificaciones nesta preba. Según informó Sidra Trabanco, pente medies d'una nota prensa, namás les pipes que saquen una calificación media de notable algamarán les primeres contraetiquetes de la collecha 2007 de sidra de Mazana Seleccionao.

Esti ye l'últimu control que tien de pasar la sidra de Mazana Seleccionao enantes de salir al mercáu, yá que les pipes que nun lleguen al notable nesta mesa de preba nun puen comercializase con esta marca de calidá.

Según esplicó'l voceru de la sidra de Mazana Seleccionao, Samuel Menéndez Trabanco, la mesa de preba ye ""el meyor control"" p'asegurar la calidá de la sidra de Mazana Seleccionao. Asina dixo qu'en primer llugar, ye una preba totalmente independiente, porque la fai un grupu de prebadores de reconocíu prestixu n'Asturies; amás, ye una cata ciega, yá que los prebadores nun conocen de qué llagar ye l'amuesa."