Homenaxe a la música asturiana n'asturianu

"L'actu de celebración del Día de les Lletres Asturianes que tolos años convoca l'Academia de la Llingua Asturiana, tuvo marcáu pol homenaxe de la institución a los músicos asturianos, pola so ""capacidá de coneutar cola xente"" y poro, la so""importancia nel procesu normalizador"".

Al entamu musical del gaiteru Llorián García Flórez, qu'interpretó les pieces ""Baxaben cuatro ayeranos"" y ""amiesto del valle a lo suelto"", siguieron les actuaciones de los míticos grupos: Nuberu, Los Berrones, Llan de Cubel, Carlos Rubiera y Dixebra; representaos nes voces de los sos cantantes.

El grupu compuestu por Chus Pedro Suárez y Manolo Peñayos abrió con un ""pupurri"" de cantares al que-y siguió'l míticu cantar ""como tu yes"", poema musicáu de José Benito Álvarez Buylla que fala de la propia Asturies. Darréu vieno'l ""agro rock"" del grupu de Llaviana ""Los Berrones"", pa siguir cola interpretación de Llan de Cubel per parte del so cantante Marcos Llope.

Llope punxo sobre les tables del Campoamor los poemes musicaos ""Rigu Esva"" de Fernán Coronas (Padre Galo) y ""La casa gris"" d'Inacio Llope, tema al que s'unieron Chus Pedro y Carlos Rubiera. Esti últimu, cantautor perconocíu del ""Nuevu canciu astur"", interpretó ""Sardinera de Xixón"" y ""Cuando salí de Cabrales"", cantar perteneciente al so últimu discu ""Asturianaes"" que-y dedicó a so pá muertu hai pocos meses.

Pa finar Xune Elipe, cantante de Dixebra, fizo que gran parte del teatru cantara la so ""Rapaza nacionaliega"" y ""mañana fría"", poniéndo-y el ramu asina a una xornada de celebración y vindicación llingüística."