Cangas y La Pola Siero, centros festivos

Les fiestes del Carme protagonicen la fin de selmana, destacando les de Cangas y les de La Pola Siero. El Rebolleres, la 'Semana Negra' o'l Mercáu Social de Nava son otres cites.

Mañana, día 16, ye'l Carme y media Asturies ta de folixa. Cangas del Narcea ye ún de los centros festivos y yá prepara la Descarga, que va celebrase mañana a les 20 hores cuando la virxe del Carme tea nel centru de la ponte romana. Un espectáculu únicu que va atrayer a miles de persones a esta población.

Darréu va comenzar la segunda verbena coles orquestes Beatriz y Anaconda, que tomen el relevu de Superhollywood y Waykas, que protagonicen la de güei a partir de les 22.30 hores nel parque Los Nogales. Nes dos nueches tamién van poder contemplase dellos espectáculos pirotécnicos.

El Carmín

La gran romería del centru d'Asturies ye, ensin dulda, el Carmín, que se celebra siempre'l llunes depués del Carme. Miles de persones enllenen dende les 15 hores el prau de La Sobatiella pa disfrutar d'una xornada ente comida, sidra y bona compañía, pa siguir la folixa pela nueche cola verbena coles orquestes Vivian's y Nueva Banda, los DJ David Dee y Márcos Sánchez o la discoteca-móvil Alyan Eventos.

Sicasí, la fiesta en La Pola Siero yá comenzó y pa esta nueche hai programao rock y música llatina. Siniestro Total, Stukas y el DJ Diego Laruelo protagonizarán la xornada de mañana, mentes que'l domingu'l la diversión va ponela Paco Pil con una fiesta remember.

VIII Rebolleres Rock

El prau Gervasia de Candás torna a acoyer un Rebolleres Rock pese a los problemes que l'Ensame Xuvenil Trisquel tuvo esti añu pa entamalo por mor de la postura del Conceyu de Carreño con respeuto a les ayudes pa la organización del mesmu. Nesta ocasión los grupos participantes son Rock'n'Guaḥes (19 hores), La Tarrancha (20 hores), Desakato (21.30 hores), Skama la Rede (23.20 hores) y Lendakaris Muertos (01.10).

La entrada ye de baldre, pero la organización afala a los asistentes a que traigan alimentos non perecederos pa la Cruz Bermeya col oxetivu de repartilos ente aquelles families que lo necesiten.

'Semana Negra'

En Xixón, onde'l branu vien siempre cargáu d'eventos, continua celebrándose la 'Semana Negra', que fina'l domingu. Ente l'amplia programación del certame dedicáu a la lliteratura prieto destaca la presentación del curtiumetraxe 'Al llau del pozu' de Marino Franco, actu que se va celebrar a les 20.45 hores na carpa 3 y nel que va participar Damián Manzano.

Nos conciertos del escenariu principal, mentes, van participar Trash Tornados, esta nueche, y One for Apocalypse, mañana. Dambos van comenzar a les 22.30 hores.

Festival "Sol Celta"

N'Avilés continuen esti fin de selmana col Festival "Sol Celta". El vienres tendremos como actuación más destacada a Rodrigo Cuevas,  el sábadu pasarán pelos escenarios Dubia, L+R, Ajo Band y el Koku L Manzana. Cerrarase el festival el domingu con un pasucais dende les 19 h. y a les 20h. teatru col Garapiellu na c/Sol.

Mercáu Social de Nava

Como tolos tercer sábados de cada mes, entámase na Plaza Manuel Uría'l Mercáu Social de Nava. Nél, ente les 11 y les 15 hores, los visitantes van poder atopar productos de la güerta ecolóxica, ellaboraos, artesanía y música, ente otros productos.