El terrorismu ataca Francia coincidiendo col 14 de xunetu

Un camión conducíu por un francés de 31 años d'orixe tunecín arrolló na nueche del xueves nel paséu marítimu de Niza (Nissa) a una multitú de persones que festexaben el 14 de xunetu, fiesta en Francia que conmemora la toma de la Bastilla. Hai al menos 84 muertos y un centenar de feríos, de los que venti tán graves.

Pese a que l'Estáu Islámicu nun reconoció l'autoría del atentáu –sí dixo celebralo–, l'ataque vencéyase al terrorismu islamista. Mohamed Lahouaiej actuó solu y consiguió atravesar les barreres instalaes pa cortar el tráficu del paséu marítimu de Niza, onde miles de persones diben congregase pa preseciar el llanzamientu de fueos artificiales pol mor del 14 de xunetu.

Yeren alredor de les 23 de la nueche y el conductor dirixó'l so Renault Midludme, de 19 tonelaes, hacia los adultos y neños que taben presentes nel nomáu Paséu de los Ingleses, percorriendo hasta dos quilómetros y faciendo zig-zag col mesmu pa provocar el dañu máximu posible. Nun sería hasta cuando la Policía abatiera a Lahouaiej cuando ésti cesó'l so ataque, dexando atrás 84 muertos, un centenar de feríos y escenes de pánicu, cola xente corriendo d'un llau a otru.

Esti atentáu produzse ocho meses depués de los de París y cuatro de los de Bruxeles. El presidente francés Françoise Hollande decretó esta madrugada la prolongación trés meses más del estáu d'emerxencia que diba finar el día 26 d'esti mes.

Semeya De Moulderkurt.5 baxo llicencia CC BY-SA 4.0.