Ana Cano diz que "nun hai otra xida" que la "reconocencia esplícita de la oficialidá"

"La presidenta de l'Academia de la Llingua Asturiana reconoz, nel so tradicional discursu del Día de les Lletres Asturianes nel Teatru Campoamor d'Uviéu, que ""nun hai otra xida"" que la ""reconocencia esplícita de la oficialidá"" nel Estatutu d'Autonomía.

Cano, que fizo un repás pela situación de la llingua asturiana na universidá, los medios de comunicación y l'alministración, refirióse a la nueva académica de númberu de l'Academia que preside como ""un honor y un luxu pa la institución"".

No referente a la Universidá, Cano fizo alcordanza de les últimes eleiciones a rector y el fechu de que la llingua asturiana tuviera presente, en mayor o menor midida, en tolos programes de los candidatos. Asina convidó al nuevu rector, Vicente Gotor, a que ""cumpla col so programa"" no tocante a la llingua asturiana, ""asitiándola nel llugar que-y correspuende"".

D'otru llau, y no que cinca a los medios de comunicación, la presidenta de l'ALLA recordó que la llingua asturiana ""avanza namás adulces"" nesi tarrén, refiriéndose sobre manera a la presencia na Televisión del Principáu y a los sos datos d'audiencia qu'amuesen, en pallabres de la presidenta ""la demanda de la sociedá d'una programación con un usu normalizáu del asturianu"".

Na so intervención Ana Cano tamién anunció la convocatoria, pal mes de payares d'esti mesmu añu, d'una nueva Xornada d'Estudiu, nesti casu dedicada a la Hª de la llingua asturiana nel que será'l I Conceyu Internacional sobre Llingua Asturiana. Asina mesmo dixo tar en conversaciones con tolos grupos políticos presentes na ponencia estatutaria, porque dende'l so puntu de vista ""la igua del nuevu estatutu va marcar el futuru de la llingua asturiana"" y poro, ""la reconocencia esplícita de la oficialidá del asturianu, cola mesma consideranza pa la fala del Eo-Navia"".

Del mesmu mou anunció la entrega, per parte de l'Academia de la Llingua Asturiana, de delles propuestes concretes pa la execución de la posible oficialidá del asturianu y gallego-asturianu, pa ser treslladaes a la ponencia estatutaria. Dende'l puntu de vista de la presidenta esti ye l'únicu camín pa que l'asturianu seya una llingua DE y CON futuru."