Berta Piñán: "escribir n'asturianu ye un compromisu cola llingua y cola vida"

"La escritora y profesora de Llingua y Lliteratura Berta Piñán foi nomada na tarde d'ayeri, Día de les Lletres Asturianes, nueva académica de númberu de l'Academia de la Llingua Asturiana.

Nel so discursu d'investidura Piñán fizo referencia al asturianu como llingua de cultura, llingua d'espresión d'una lliteratura que ""facía posible reconocese nella"" a toles persones a les que la llingua, pese a ser la so fervía d'espresión ""yera ayena"". Nesi sen, reconoció que pese a que nel so rodiu cercanu la llingua d'espresión yera l'asturianu, nun foi sinón la lliteratura la que l'averó a esa llingua hasta entós ""tresparente"". Y que precisamente'l fechu d'escribir foi la manera de ""reconocese nella"", ""d'entrar nesa casa llevantada de pallabres antigües"".

Sorrayó asina mesmo'l valor de les llingües pa ""saber quienes somos"" y ""les direiciones a tomar"", siempre ""con pasu firme hacia'l futuru"". Un futuru que nun entiende l'autora ensin l'estatus llegal d'oficialidá de la llingua asturiana, pasu que definió como ""drechu de ciudadanía"".

Pa finar, compartió colos académicos y públicu presente nel Teatru Campoamor la so idea de la escritura definida como ""compromisu cola llingua y cola vida"", pues partía del oxetivu común de ""defender la llingua"" al tiempu que ""llevantaba la lliteratura""."