La manifestación del Día de les Lletres enllena otra vuelta les cais d'Uviéu

"La manifestación convocada pola Xunta pola Defensa de la Llingua Asturiana, volvió a axuntar a miles de persones que, como tolos años, manifiéstense peles cais d'Uviéu pa pidir la reconocencia oficial de la llingua asturiana nel Estatutu d'Autonomía.

La marcha salió de la Estación del Norte d'Uviéu, encabezada por una pancarta na que podía lleese'l llema de la manifestación: ""Na reforma del Estatutu: l'asturianu llingua oficial"". Percorrió tola cai Uría y acabó énte'l Teatru Campoamor, onde un representante de la Xunta fizo llegar un comunicáu nel que se criticaba la negativa del gobiernu asturianu a reconocer la oficialidá.

Nel comunicáu criticábase asina mesmo l'actitú de los ""partíos mayoritarios"" a lo llargo d'estos 25 años dende l'aprobación del primer Estatutu d'Autonomía d'Asturies. La Xunta reconoció, basándose nesti factor, que se parte d'una ""situación non favoratible"", sin embargu, tamién se dexó claro que'l ""camín ye llargu y ya tenemos andao"".
Nesti sen, ficieron un llamáu a la responsabilidá de los partíos mayoritarios, en ""esti momentu políticu decisivu"". ""Más pronto que tarde van tener qu'abrir el procesu de reforma del estatutu, porque si nun se recueye la oficialidá, la reforma nun va ser definitiva"".

Pidieron por esti motivu a los partíos parlamentarios que faigan un ""exerciciu de responsabilidá"". ""Ye hora d'abandonar unes posiciones que ya se demostraron ineficaces hai tiempu, ye hora d'abandonar los xuegos de pallabres y falar claro: na reforma del Estatutu, l'asturianu llingua oficial"", finó'l testu.

Nel actu pudieron vese les pancartes de les asociaciones, sindicatos y partíos que sofitaben la convocatoria, ente elles la d'Izquierda Xunida-Bloque por Asturies-Verdes, portada ente otros, por Rafael Palacios, voceru del Bloque, y Jesús Iglesias, diputáu d'IX na Xunta Xeneral; asina como l'asociación eo-naviega Xeira; los sindicatos Suatea, CC.OO y UXT; y les formaciones polítiques AA y UNIDÁ."