Llamazares alvierte a Javier Fernández que l'apoyu a Rajoy tendría consecuencies n'Asturies

El voceru d'Izquierda Xunida (IX) na Xunta Xeneral Gaspar Llamazares señaló que l'apoyu del PSOE "por activa o por pasiva" pa dar el Gobiernu estatal a Mariano Rajoy tendría les sos consecuencies n'Asturies. "Afeutará, ensin dulda, al alcuerdu d'investidura y al cambiu d'izquierdes", asegura.

"El grupu parllamentariu d'Izquierda Xunida nun se resigna a un Gobiernu central del Partido Popular, a un Gobiernu de Mariano Rajoy. Por eso queremos comunica-y al presidente del Principáu que l'alternativa nun pue ser la complacencia nin l'apoyu a la continuidá d'un Gobiernu que bloquia, cerca y afita midíes inxustes pa con Asturies, les sos infraestructures, industries y agricultura", alvierte Llamazares.

La posibilidá de que'l PSOE permita gobernar al PP de Mariano Rajoy en minoría cola so astención llevaría, según afirma'l voceru d'IX na Xunta, a un cambiu ente les rellaciones de les dos formaciones nel país. "Una política de sofitu al PP a nivel del Estáu traerá consecuencies a las rellaciones polítiques nel senu de la izquierda asturiana. Afeutará, ensin dulda, al alcuerdu d'investidura y al cambiu d'izquierdes", añade.

Mentes, Pedro Sánchez, candidatu socialista a La Moncloa, ratificó ayeri en persona a Rajoy que'l PSOE votará non nel casu de que l'actual presidente en funciones se presente a la investidura. Sicasí, nun esclarió si va tratar de formar Gobiernu pela izquierda.