L'Infiestu acueye l'actu de celebración del Día de les Lletres nes escueles

"La Conseyería d'Educación y Ciencia del Principáu d'Asturies contó esti añu cola collaboración del Colexu Públicu de L'Infiestu pa la organización del actu del ""Día de les Lletres"", actu nel que tuvieron presentes Conseyeru d'Educación y Ciencia, José Luis Iglesias Riopedre; el coordinador d'enseñanza de llingua asturiana del Principáu, Fernando Padilla Palacio; y l'alcalde de Piloña, Camilo Montes Díaz.

A lo llargo del actu entregáronse los trofeos del XIII Certame de poesía y dibuxu y el V Certame de Cartelismu, empobinaos a estudiantes de llingua asturiana d'Educación Infantil, Primaria, Secundaria y Bachilleratu.

En total participaron alredor de 1.200 alumnos con poemes, dibuxos y cartelos inspiraos na vida y obra de MªTeresa González, autora xixonesa a la que se-y dedicaba esti añu la Selmana de les Lletres.

Na so intervención, José Luis Iglesias Riopedre calificó de ""bultable"" la progresión al alza de matriculaciones na asignatura. Asina, nel cursu del 2006-2007 estudiaron Llingua Asturiana más de 15.000 alumnos en Primaria (53%) y 4.200 en Secundaria (14%). Estes cifres aumentaron nesti cursu hasta algamar los 16.200 alumnos en Primaria (55%) y 4.500 en Secundaria (15%). La enseñanza concertada pasó de 240 alumnos en tres centros nel cursu pasáu a más de 800 en 10 nésti.

No tocante al profesoráu, de los 195 profesores interinos contrataos nel cursu 2006-2007 pasose a los 207. El conseyeru rellacionó esti importante incrementu con dalgunes de les midíes adoptaes pol Gobiernu asturianu en materia de fomentu y promoción de l'asignatura de Llingua Asturiana. Ente elles sorrayó los curricula de Primaria, Secundaria y Bachilleratu; aumentu de la ufierta del plan rexonal de formación del Profesoráu, con cursos empobinaos específicamente al profesoráu d'Asturianu; y les dotaciones de fondos en Llingua Asturiana pa les biblioteques escolares de los centros. Asina mesmo faló d'otru tipu d'iniciatives como'l portal ""Puertuasturies"", que cuenta con más de 82.000 visites ya importantes descargues de materiales n'asturianu pa trabayu nel aula."