"La obra de Teresa trata les grandes entrugues y les rempuestes cencielles"

"La XXIX Selmana de les Lletres, qu'esti añu dedicara la Conseyería de Cultura del Principáu d'Asturies a la figura de la escritora asturiana MªTeresa González, clausuróse esti vienres en Xixón con una ofrenda floral nel barriu de nacencia de l'autora, y cola presentación de les sos Obres Completes.

Na presentación d'esti llibru tuvieron presentes la direutora xeneral de Promoción Cultural y Política Llingüística, Consuelo Vega; el conceyal d'Educación y Cultura del Ayuntamientu de Xixón, Justo Vilabrille; el coordinador de la obra, Leopoldo Sánchez Torre; y el responsable del prólogu de la narrativa inédita, l'escritor Vicente García Oliva.

Esti últimu esplicó na so intervención la estructura de les Obres Completes, dividíes en trés estayes pola mor del so conteníu temáticu: poesía, narrativa ya inéditos. Asina mesmo xustificó la presencia d'un prólogu pa caúna d'elles pola implicación direuta de los sos autores na obra de Teresa González. Nel casu del primeru d'ellos, Xuan Xosé Sánchez Vicente, atoparíamosnos ente'l ""descubridor"" de la calidá lliteraria d'unos poemes que, según el propiu García Oliva ""nun yeren nun primer momentu más que notes manuscrites en papeles de diferente calter"". D'otru llau, y no tocante a la narrativa, l'autoría de prólogu d'Antón García respondería a que foi él el primeru n'interesase polos cuentos de l'autora de Tremañes, espublizando na editorial de la que yera responsable ""La Casa y otros cuentos"", obra que sería amás el primer llibru de narrativa d'una muyer n'asturianu.

Leopoldo Sánchez Torre, coordinador de les obres completes, desarrolló na so percuidada esposición los motivos que lu llevaron a averase a la obra de Teresa, que describió como una lliteratura que ""trata les grandes entrugues y les rempuestes cencielles"".

Pa finar, Consuelo Vega agradeció'l trabayu de toles persones que ficieron posible la XXIX Selmana de les Lletres, al empar que valoraba la posibilidá de dar a conocer, al traviés d'esta selmana, el repertoriu de nomes propios de la lliteratura n'asturianu al que yá se suma, dende agora, el de MªTeresa González.

Na semeya (de la manzorga a la mandrecha): Leopoldo Sánchez Torre, Justo Vilabrille, Consuelo Vega y Vicente García Oliva"