L'ALLA convida a participar nel actu del Día de les Lletres

"L'Academia de la Llingua Asturiana convoca, pa esti día 9 de mayu ""Día de les Lletres Asturianes"", el so tradicional actu de celebración d'una Xunta Estraordinaria que tendrá llugar, como ye vezu, nel Teatru Campoamor d'Uviéu a les 20.00 hores.

L'entamu musical d'esti añu correrá a cargu del gaiteru Llorián García, al que siguirá la Xunta Académica Estraordinaria na que se dará acoyida a la nueva académica de númberu de la institución: la escritora Berta Piñán. Amás, y dempués del discursu institucional de la presidenta, Ana Cano González, l'Academia de la Llingua Asturiana rindirá homenaxe a la música asturiana al traviés de l'actuación de dellos de los músicos más representativos de la mesma.

Col nomamientu de la escritora Berta Piñán como nuevu miembru de númberu, l'Academia quier reconocer ""la fondura de la so contribución lliteraria al procesu de recuperación llingüística n'Asturies y facer posible, al empar, qu'esa valible contribución pueda enanchase col so trabayu dientro de la propia institución"".

Asina mesmo, y como yá diera anuncia la presidenta de l'ALLA nel discursu del añu anterior, la institución quier facer un homenaxe esti añu'l llabor normalizador de los músicos asturianos pa cola llingua. Asina, y poniéndo-y el ramu a la xornada vindicativa y festiva, xubirán a les tables del teatru Campoamor los intérpretes: Nuberu, Dixebra, Llan de Cubel, Carlos Rubiera y Los Berrones; en representación de tolos grupos que ficieron del asturianu un instrumentu más de los sos cantares."