L'Exércitu iraquí confirma la detención del presuntu cabezaleru d'Al Qaeda n'Iraq

"El cabezaleru d'Al Qaeda n'Irak, Abu Ayyab al Masri, tamién conocíu como Abu Hamza al Muhajir, pudo ser arrestáu poles fuerces de seguridá iraquís dempués de qu'ún de los sos llugartenientes que fuera deteníu los llevara hasta la casa onde dormía, na ciudá de Mosul, nel norte d'Irak, según informaron fontes militares iraquís.

Pela so parte, l'Exércitu estaounidense en Bagdad comentó que tán investigando si Al Muhajir realmente foi deteníu. Si se confirma, esti arrestu diba ser un duru golpe p'Al Qaeda n'Iraq.

Un voceru del Ministeriu del Interior iraquí esplicó qu'ún de los aliaos del supuestu terrorista foi deteníu nuna operación anterior, y llevó'l pasáu miércoles a les fuerces nacionales hasta'l llugar onde s'escondía Al Masri. Tres ser deteníu, Masri confesó que ye'l cabezaleru d'Al Qaeda n'Iraq, según el voceru, anque añadió que tovía tien de confirmase la so identidá. Al paecer, el sospechosu ta agora en manes estaounidenses pa facer la identificación.

Amás, el gobernador de la provincia de Nineveh, Duraid Kashmula, confirmó que'l deteníu confesó ser Masri. ""Cuando la Policía entró na casa, lu alcontraron dormiendo"", añadió'l gobernador, quien afirmó que'l deteníu taba solu. ""Nun hai nenguna duda de que'l deteníu ye Masri"". ""La operación foi rápida, nun hebo enfrentamientos"", añadió."