"Porque tamién ye tuya, l'asturianu llingua oficial"

"Esti vienres 9 de mayu, Día de les Lletres Asturianes, la Xunta pola Defensa de la Llingua Asturiana convoca una manifestación que saldrá a les 19.00 hores de la Estación del Norte d'Uviéu pa finar nel Teatru Campoamor. Nesti casu'l llema de la manifestación va ser: ""Na reforma l'Estatutu, l'Asturianu Llingua Oficial"".

Al traviés d'una nota de prensa la Xunta recuerda que ""los asturianos somos los únicos ciudadanos del Estáu que nun tenemos reconocíos los nuesos derechos llingüísticos"", situación que podría cambiar na ellaboración del nuevu estatutu, testu que, sorrayen ""nun podemos dexar que se cierre en falso: la nuesa llingua tien que ser oficial, como les demás"".

Al empar, comparen la situación asturiana cola d'otres comunidaes españoles nes que ""hai más de venticinco años"" los sos parlamentos ""incluyeron nos sos estatutos d'autonomía'l reconocimientu oficial de les sos llingües propies""; por embargu Asturies vió nacer un estatutu que, camienten, llegó ""de la mano d'una clase política provinciana que quixo borrar de la hestoria la nuesa realidá llingüística y cultural"".

Poro, denuncien los casos de discriminación pola mor de la llingua d'usu que ""añu tres añu siguen apaeciendo"" nos distintos ámbitos, ""medios de comunicación, nel sistema educativu, nes alministraciones, etc"", y sorrayen que, nel momentu históricu nel que nos atopamos, ""nun podemos dexar que por culpa d'unos intereses partidistes irresponsables condenen a muerte a una llingua que pertenez al nuesu pueblu dende va más de mil años""; convidando a sumase a esta manifestación."