Los sindicatos d'enseñanza animen a participar na manifestación convocada pola Xunta

"Los sindicatos asturianos d'enseñanza Suatea, FETE-UXT y Federación d'Enseñanza de CC.OO manifiesten, pente medies d'un comunicáu de prensa, el so sofitu a la manifestación convocada pola Xunta pola Defensa de la Llingua Asturiana con motivu del Día de les Lletres Asturianes.

Los sindicatos animen a participar nuna movilización que, apunten, tien como oxetivu consiguir la única ""solución definitiva"" pa la problemática de la llingua asturiana nes escueles.

Nesti sen, denuncien l'ausencia de la materia de llingua de curricula asturianos, como'l del borrador d'Educación Infantil, estaya na que por embargu s'impartía l'asignatura ""de forma análoga a la de Primaria nos centros en qu'esistía tal voluntá y disponibilidá de profesoráu"". D'otru llau, y no tocante a los curricula de Primaria y Secundaria, faen referencia a la llei d'usu y a la contradicción que s'establez ente les disposiciones llegales presentes na llei y ""la esistencia de ratios mínimes de 10 alumnos"". Al empar ponen sobre la mesa la problemática d'asitiar la llingua asturiana en competencia con otres materies, fundamentalmente Segundu Idioma, lo que supón una discriminación p'aquellos qu'escueyen asturianu, pos renuncien a una segunda llingua estranxera"", na estaya de Secundaria.

No que cinca a los centros concertaos sorrayen ""la obligatoriedá de la so ufierta"", obligatoriedá qu'españa colos datos remanaos y poro, colo que dende'l so puntu de vista ye un ""incumplimientu de la normativa"".

D'otru llau, y no referente a la situación del profesoráu de llingua asturiana, piden la creación de la especialidá universitaria, al tiempu que desixen ""la convocatoria d'oposiciones y, por mor, la creación de places nes plantiyes orgániques de los centros"". Por too ello, caltienen que la solución d'esta problemática llegaría cola oficialidá de la llingua asturiana, estatus llegal pal que poden la participación na manifestación convocada pal próximu vienres 9 de mayu y con salida na Estación del Norte d'Uviéu a les 19.00 hores."