La Escuela d'Asturianía ufierta 27 places nueves

"El viceconseyeru de Seguridá, Emigración y Cooperación al Desarrollu, Valentín Ruiz, y el presidente del Conseyu de Comunidaes Asturianes, Manuel Fernández de la Cera, participaron esti martes nuna rueda de prensa na qu'esplicaron los oxetivos de la escuela de branu d'Asturianía qu'organiza'l Conseyu de Comunidaes Asturianes.

La Escuela fai por formar monitores de cultura y música tradicional asturiana pa que puedan convertise n'enseñantes nos Centros Asturianos con reconocimientu d'asturianía, col envís d'afondar nel conocimientu de l'Asturies d'anguaño al tiempu que caltienen vives del tradiciones.

Pa participar na Escuela d'Asturianía fai falta ser nacíu n'Asturies o descendiente d'asturianos, tener 18 años cumplíos enantes del entamu de la escuela y ser sociu d'un Centru Asturianu con reconocimientu d'asturianía. El programa d'esta tercer edición será de 300 hores llectives repartíes en trés cursos o estayes que va facese n'Asturies nos meses de xunetu de los años 2008, 2009 y 2010. Nesti casu convóquense un total de 27 places, 13 pa la especialidá de gaita y 14 pa baille.

El primer cursu entamará n'Uviéu'l próximu 16 de xunetu y finará el 31 del mesmu mes. Amás de baille y gaita, l'alumnáu tien clases d'Antropoloxía y Llingua Asturiana, Conocimientu del Mediu, Folklor, Percusión, Conxuntu Instrumental, Canción Asturiana y Talleres de Gaita y Traxe'l país.

Los cursos de branu de la Escuela d'Asturianía entamaron nel añu 2002 como rempuesta a una vindicación que plantegaren dende hai bien de tiempu los Centros Asturianos. En 2004 entregáronse 20 diplomes acreditativos de la primer promoción, demientres que l'añu pasáu finó con 25 titulaos."