Rajoy almite que'l PP ta pasando "un momentu difícil"

"El cabezaleru del PP, Mariano Rajoy, nun quixo esclariar si va adelantar el nome del sustitutu d'Ángel Acebes na Secretaría Xeneral, por embargu sí qu'almitió que'l partíu ta pasando per un ""momentu difícil"". Dicho esto, quixo treslladar un mensaxe de ""tranquilidá"" y recordó que'l partíu ""ya demostró"" que sabe sobreponese a los ""momentos difíciles"".

""Namás tengo que dici-yos a toles persones que votaron al PP y a tolos militantes del partíu, qu'efeutivamente ye un momentu difícil pero que les coses vamos faceles con sentíu común y con seriedá y les decisiones del PP van tomales los compromisarios que representen a tolos militantes"", afirmó.

El presidente de los populares fizo estes declaraciones tres participar nun homenaxe a títulu póstumu al diputáu del PP Rogelio Baón, que morrió'l pasáu mes de febreru. Nel actu, que se celebró na Universidá Europea de Madrid, participaron tamién el presidente del Congresu, José Bono, el defensor del Pueblu, Enrique Múgica, el presidente fundador del PP, Manuel Fraga, y los diputaos Juan Moran y Federico Trillo, ente otros.

Al finar l'actu, Rajoy fizo declaraciones a la prensa sobre los negativos datos del paru, correspondientes al mes d'abril, pero refugó manifestase sobre la situación del so partíu, y, sobre manera, sobre si va revelar el so equipu enantes de que se celebre'l Congresu Nacional de xunu, como-y pidieron Gustavo de Arístegui, Ignacio Astarloa o Francisco Granados."