El PP, únicu de los cuatro partíos principales en crecer en númberu de votos y escaños

El Partido Popular (PP) ganó les eleiciones d’esti domingu. Col 99,71 por cientu contabilizao, el partíu que gobierna en funciones suma 137 diputaos, 14 más que’l 20-A, convirtiéndos na única formación que medra en númbero de votos y escaños. Finalmente nun hebo ‘sorpasso’ de Xuníos Podemos al PSOE.

El porcentaxe de votos al PP foi del 33,02 por cientu, por un 28,71 por cientu d’hai seis meses. Mentes, el PSOE algamó un 22,67 por cientu (22 por cientu), anque pierde 5 escaños al sumar 85, y Xuníos Podemos y les distintes candidatures territoriales en coalición algamen 71, dos más que les que rexistró Podemos el 20-A.

Ciudadanos tamién empeora resultaos, al perder 8 diputaos (de 40 a 32), con un 13,04 por cientu (13,94 por cientu). Tamién algamen representación nel Congresu Esquerra Republicana de Catalunya-Catalunya Sí (9), Convergència Democràtica de Catalunya (8), EAJ-PNV (5, pierde 1), EH Bildu (2)  y Coalición Canaria-Partido Nacionalista Canario (1). Fuera del arcu parllamentariu, la formación más votada foi PACMA (1,19 por cientu).

La participación foi mayor que nel 20-A, con un 69,84 por cientu (69,67 por cientu). El porcentaxe de votos nulos foi del 0,93 por cientu (0,89 por cientu), y el de votos en blancu’l mesmu que l’añu pasáu: 0,75 por cientu.

Hai que destacar que’l PP ganó en tolos territorios menos n’Euskadi y Catalunya, onde’l trunfu foi pa Podemos.

Duldes pa formar Gobiernu

Pese a ameyorar resultaos, el PP sigue lloñe de la mayoría absoluta, polo que tendrá que negociar pa formar Gobiernu. La situación ye mui asemeyada a la de la llexislación finada con antelación y habrá que ver qué movimientos puede facer Mariano Rajoy pa sumar apoyos pa continuar na presidencia. Pa ello debería contar col sofitu del PSOE o la so astención.