La Xunta Xeneral súmase a los actos de la Selmana de les Lletres con una llectura pública

"La Xunta Xeneral del Principáu d'Asturies, en comuña cola Conseyería de Cultura, súmase mañana a la celebración de ""La XXIX Selmana de les Lletres Asturianes"" cola llectura pública de dellos testos lliterarios n'asturianu. La llectura entamará a les 13.00 hores nel Salón Europa.

L'actu, que va tar presentáu pola presidenta de la Xunta, María Jesús Álvarez González, entamará cola llectura d'un poema de María Teresa González incluyíu nel volume ""Obres completes"", editáu pola Conseyería.

Darréu van siguir lleendo poemes d'esta mesma publicación, el delegáu del Gobiernu, Antonio Trevín; y los conseyeros de Cultura, Encarnación Rodríguez Cañas; Educación, José Luis Iglesias Riopedre; Salú, José Ramón Quirós, ya Infraestructures, Francisco González Buendía.

Amás cuenten participar nel actu la direutora de Promoción Cultural y Política Llingüística, Consuelo Vega; la presidenta de l'Academia de la Llingua Asturiana, Ana Cano; el presidente del Conseyu de Comunidaes Asturianes, Manuel Fernández de la Cera; y dalgunos diputaos de los trés grupos políticos representaos na Xunta - PSOE, PP y IX/BA/LV-.
Los más de los testos van pertenecer a la publicación editada pola Xunta Xeneral con motivu d'esta celebración, baxo'l títulu ""Sentir que toi viva"". El llibru contién un total de 40 relatos curtios escritos especialmente pa esta ocasión por otros tantos autores asturianos.

Ente los parlamentarios de la Xunta que van participar na llectura figuren Pilar Alonso, Faustino Álvarez, Cristina Coto, Joaquín Aréstegui, Emilio Pérez Cueva y Jesús Iglesias. Tamién van lleer diputaos por Asturies nel Congresu y senadores como José Manuel Cuervo, Hugo Morán, Pilar Fernández Pardo y Dorinda García."