Los candidatos esixen la dimisión inmediata de Fernández Díaz

Namái Mariano Rajoy salió en defensa del ministru del Interior en funciones tres filtrase unes conversaciones col direutor de la Oficina Antifraude de Catalunya.

Nelles Jorge Fernández Díaz afalaba a Daniel de Alfonso a que buscara asuntos incriminatorios contra l'hermanu d'Oriol Junqueras y otros dirixentes de formaciones nacionalistes catalanes. L'oxetivu yera deprestixar al movimientu soberanista catalán.

Esta noticia desvelada pol diariu dixital 'Público' tuvo, como yera d'esperar, una repercusión amplia en plena campaña eleutoral. Los candidatos de los principales partíos de la oposición nun tardaron n'esixir la dimisión de Fernández Díaz, que nun llegó, polo que demandaron al presidente tamién en funciones que lu cesara.

La reaición de Rajoy, sicasí, foi la d'apoyar al so ministru, qu'esplicó que ye "víctima" d'una operación política y que nun queria "da-y esi gustu al independentismu". Pela so parte, Rajoy afirmó que lo que s'intenta con esta información "a cuatro díes de les eleiciones" ye "aprovechar y pescar en ríu revueltu", y confirmó la so "confianza plena" en Fernández Díaz.