Les xornaes "onde l'agua ñaz" sorrayen que'l proyeutu del banzáu de Caliao ye "inxustificable"

"La vocera de la Plataforma pola Defensa de Redes, Gloria García, manifestó qu'una de les conclusiones principales de les xornaes ""Onde l'agua ñaz"" que tuvieron llugar dende'l xueves nel conceyu de Casu ye que'l proyeutu pa desarrollar un banzáu en Caliao ""nun ye necesario"".

Les xornaes sobre xestión del agua, que se celebraron en Caliao durante los díes 1, 2, 3 y 4 de mayu, tuvieron organizaes pola Plataforma pola Defensa de Redes y la Fundación Nueva Cultura del Agua.

Gloria García señaló que nun hai nenguna razón que xustifique la construcción d'un banzáu nuna zona protexida como'l Parque de Redes. ""Nenguna alministración pudo entovía xustificar la necesidá d'una infraestructura d'esti calter"". La vocera de la Plataforma recordó que n'Asturies nun hai problemes col abastecimientu del agua y que nunca hubo problemes d'esa mena nuna zona que, amás, ta perdiendo población.

D'otra miente, García Nieto sí llamentó que'l Principáu nun ponga en marcha nengún programa de xestión del agua. Precisamente durante les xornaes, valoráronse programes como los de la ciudá de Sevilla, que con 100.000 habitantes más y un programa d'un llargor de 10 años, fueron a baxar el consumu d'agua nun 30%.

Pela contra n'Asturies ""nunca se fizo una política seria de control del recursu y d'una xestión eficiente"", señaló Gloria García. Asina, esplicó que plantegar la construcción d'un banzáu en Caliao ye ""inxustificable"".

Arriendes d'ello, trenta profesores de la Universidá d'Uviéu roblaron nestes xornaes un manifiestu nel que valoren el banzáu proyectáu como ""un caprichu de les élites económiques"", pidiendo un cambéu de política del agua."