La figura de MªTeresa González centra los discursos de presentación de la Selmana de les Lletres

"La presentación de la XXIX Selmana de les Lletres, que tenía llugar esti llunes a les 12.00 hores nel salón d'actos del Centru Municipal d'El Coto, en Xixón, contó cola presencia de gran cantidá de públicu y autoridaes. Ente estes últimes rescampló l'asistencia de la conseyera de Cultura y Educación, Encarnación Rodríguez Cañas; l'alcaldesa de Xixón, Paz Fernández Felgueroso; el conceyal de Cooperación, Cultura Tradicional y Política Llingüística, Jesús Montes Estrada; el conceyal d'Educación, Justo Vilabrille; y la direutora xeneral de Promoción Cultural y Política Llingüística, Consuelo Vega.
Na so intervención, Encarnación Rodríguez Cañas, faló del ""exemplu tempranu del compromisu pol asturianu"" amosáu por Mª Teresa González, autora xixonesa a la que se-y dediquen los actos de la selmana, lo que merecía ""esti homenaxe institucional y coleutivu de les nuestres lletres"".

Xosé Bolado, coordinador del llibru ""Por si dixerais el mio nome.."", fizo referencia a la comunicabilidá y emoción que tresmite la obra de MªTeresa, espeyada na publicación al traviés de los testos de dellos autores. Nellos, esplicó, faise un percorríu pela presencia bibliográfica, ""la personalidá histórica"" de l'autora, pa dempués analizar el contestu sociopolíticu nel que se desarrolló la so obra, al tiempu que s'afonda nos aspeutos más lliterarios de la so prosa y poesía.

En pallabres de Bolado, ""MªTeresa entamó a ser valorada col pasar del tiempu, y tovía tien que reconocese'l so valor como escritora"", siendo lo más importante ""averase a los sos testos y la so obra"". Asina, y poniéndo-y el puntu al actu, recitó un poema que MªTeresa González-y dedicó a la madre.

Fuiste quedando quieta
Como una ñube
Ensín el soplín del aire.
Colaste sele, lo mesmo
Que vivieres
Sin el marmullu de quexes o llamentos.
Pasaste a ser
Un rostru maxináu
Endolcáu na mezclienda de los suaños,
Al bellume alloñáu de la nueche.
Quedástete
Afitada nel coral
Esñizándote sele, sin ruxíu
Talo que'l sable d'un reló
Qu'enxamás s'apara.
Y camenté pa mí, qué raro que yera
Que l'alborada corriera comu siempre
Espardida ente los praos
Ente les sebes,
Oyer glayar a les Mas tres de los neños,
A la muyer que merca les sardines,
Al ruxir de la vida cotidiana.
Namái la calle de los güertos
Notó l'ausencia,
Atristayó la tierra
Quedó muda la fonte
Afogada d'escayos y d'ortigues.
Espolletó'l bardial, onde enantes
Creciere la rosa
Y enllenóse de mofu la fesoria
Y el tiempu de povisa.
Naide t'echó de menos,
Yá lo ves,
Namás lo que ñaciere
A la solombra amante del to cuerpu.

Na semeya (de la manzorga a la mandrecha): Xosé Bolado, Jesús Montes Estrada, Encarnación Rodríguez Cañas, Paz Fernández Felgueroso, Consuelo Vega y Mauro García-Oliva González, fíu de MªTeresa."