La XDLA acude a la puerta del CP Buenavista II pa responder al casu de desinformación sobre la materia d'asturianu

"La direición del centru tien que rectificar la información dada, non namás pidir disculpes y dexar desinformada a la so comunidá educativa", asegura la XDLA, que repartió octavilles na puerta del colexu públicu uviedín Buenavista II. Iniciativa pol Asturianu tamién anima a facer públicos tolos casos asemeyaos.

Nesta mañana dellos miembros de la Xunta pola Defensa de la Llingua Asturiana (XDLA) averáronse a la puerta de la escuela uviedina pa entregar octavilles a los padres y madres de los alumnos nes qu'esplica de manera nidia les mentires difundíes al traviés d'una carta de la direción del centru sobre la materia de Llingua Asturiana y Lliteratura con motivu de la escoyeta de materies na matriculación pal cursu viniente. Nella aseguraben que yera necesario un mínimu diez alumnos pa cursar asturianu, cuando yá nun esiste ratio, asina como que la Llingua Asturiana yera d'ufierta "obligatoria pal centru" o que "l'horariu d'estes materies detráese fundamentalmente del tiempu asignáu a les árees llingüístiques y de Conocimientu del Mediu", nun intentu claru de facer ver que l'asignatura d'asturianu quita tiempu pa otres materies.

Nuna carta posterior, "seguramente obligada pol serviciu d'inspección educativa", n'opinión de la XDLA, la direición del centru rectificaba a los cinco díes d'una manera ambigua, dalgo que nun ye suficiente pal coleutivu cívicu. "Tien qu'avisar espresamente a les families afectaes y permiti-yos a los que, confundíos pola circular anterior, matricularen yá a los sos fíos o fíes en Cultura Asturiana, rectificar la matrícula y maticulalos en Llingua Asturiana", esixe.

La necesidá de denunciar

Iniciativa pol Asturianu tamién quixo afondar nesti tema por mor de la so gravedá y afirma "qu’ésti ye un casu más de tantos nos que’l deséu personal d’ún o varios cargos del equipu directivu d’un centru que ta financiáu con dineru públicu consiguen torgar los drechos fundamentales que tienen por llei tolos escolinos asturianos a recibir enseñu de la llingua propia si asina quieren ellos y les families". D'igual forma encamienta "a los equipos directivos, al profesoráu, a les families, al alumnáu y a cualesquier otra persona que perteneza a la sociedá asturiana que denuncie ensin miramientos esti tipu d’acciones illegales como lo facemos nós".