XXIX Selmana de les Lletres Asturianes

"La XXIX edición de la Selmana de les Lletres Asturianes, que va celebrase ente los díes 5 y 9 de mayu, tará dedicada a la figura de la escritora xixonesa MªTeresa González, fallecida en 1995 y autora d'obres de narrativa y poesía como ""La casa y otros cuentos"" o ""Collaciu de la nueche"".

L'actu inagural de la selmana tendrá llugar esti llunes a les 12.00 hores nel Centru Municipal Integráu d'El Coto de Xixón, cola presentación de les dos ediciones conmemoratives ""Por si dixerais el mio nome.."" y ""Antoloxía lliteraria"". Asina mesmo quedará abierta al públicu la esposición ""La mar. Un viaxe per Tere González"", nel mesmu Centru Cultural.

""Por si dixerais el mio nome..."" ye una recopilación d'artículos de dellos autores (Marta Mori, Xosé Nel Riesgo, Milio Rodríguez Cueto, Ángeles Pollo, Xandru Fernández, Leopoldo Sánchez Torre, Berta Piñán, Marisa López Diz, Ana Vanessa Gutiérrez, Vicente García Oliva, MªElvira Muñiz, Fran Gayo y Francisco Álvarez Velasco) coordináu pol profesor Xosé Bolado al rodiu de la obra lliteraria de MªTeresa y les circunstancies sociopolítiques que l'arrodiaron.

Pela so parte ""Antoloxía Lliteraria"" ye un percorríu pela narrativa y la poesía de MªTeresa al traviés de los sos testos más significativos. La obra entregaráse nes biblioteques asturianes acompañando al préstamu d'un llibru, demientres que ""Por si dixerais el mio nome..."" será entregáu nes llibreríes.

Los actos d'esti llunes complétense cola emisión, na Radio del Principáu d'Asturies del programa ""MªTeresa González: una muyer del Surdimientu"", n'emisión especial del programa ""Nomes d'Asturies"".

MªTeresa González naz nel añu 1950 en Xixón, concretamente nel barriu de Tremañes. A los diecisiete años d'edá, y dempués de la muerte de so madre, entra a trabayar na empresa d'aplicaciones eléctriques CRADY, onde siguirá hasta'l so cierre definitivu en 1987. Les protestes pol cierre d'esta empresa, protagonizaes por muyeres, formen parte de la historia de les lluches llaborales de la ciudá, siendo MªTeresa citada por ""desórdenes públicos"" pola so activa participación nes mesmes.
En 1975 entra en contautu cola estaya de Xixón de Conceyu Bable, formando parte del grupu y principiando la so carrera lliteraria n'asturianu, carrera qu'entamará oficialmente col asoleyamientu del primer llibru, ""Collaciu de la nueche"", en 1987. Trés años dempués ganaría'l Premiu de Poesía Erótica ""Cálamo"", col poemariu ""Con húmedos lamentos de felino"". A estes obres hai que sumar ""Ochobre"" (1989) y ""Heliocentru"" (1993).
Nel tarrén de la prosa espubliza un únicu llibru ""La casa y otros cuentos"" (1994), anque apaez en delles antoloxíes lliteraries."