Ribeseya tamién celebra la Selmana de les Lletres

"La Conceyalía de Cultura del Ayuntamientu de Ribeseya, dirixida por Juan González Martino, va homenaxear a tolos escritores en llingua asturiana na so ""I Selmana Ribeseyana de les Lletres"". ""Será un homenaxe a los que siempre defendieron y caltuvieron viva la fala d'Asturies, coincidiendo col día de les Lletres Asturianes el próximu día 9 de mayu"", aseguró Martino.

Dende'l día 5 hasta'l 8 de mayu la villa acoyerá bayura d'actividaes pa ""conmemorar y mostrar"" l'asturianu a les nueves xeneraciones.

La selmana entama con una charra sobre la figura de MªTeresa González, autora a la que se-y dedica la Selmana de les Lletres d'esti añu. Al día siguiente, martes 6 de mayu, la Casa Cultura acueye una conferencia sobre los medios de comunicación n'asturianu, y al día siguiente celebraráse la entrega de los premios ""Arbidel"" de relatu eróticu, organizada pola estaya de cultura del Ayuntamientu de Ribeseya.

Pondrá'l puntu a la selmana una charra sobre ""L'asturianu güei. Situación d'una llingua"".

Toles actividaes tendrán llugar a les 19.00 hores na Casa Cultura. Amás d'estes actividaes, la conceyalía de cultura ta ellaborando un conveniu cola Academia de la Llingua pa ""trabayar en comuña pol espardimientu del asturianu"", tal y como confirmó l'edil de cultura."