Los llectores d’Asturies.com nun creen que l’episodiu de Javier Fernández col diccionariu fora una anéudota

El 85 por cientu de los nuesos usuarios que participaron en ‘Conceyu Abiertu’ opina que l’episodiu col diccionariu de l’ALLA de Javier Fernández ye ‘un exemplu más del so sentir pa col asturianu’. El presidente del país utiliza esti volume pa ellevar la pantalla d’ordenador del so despachu.

Namái’l 15 por cientu de los llectores considera que se trata d’una simple ‘anéudota’, como quería creer la presidenta de l’Academia de la Llingua Asturiana (ALLA), Ana María Cano, según afirmó en pallabres a Asturies.com tres saltar la polémica. Lo cierto ye que l’usu que fai’l socialista del diccionariu nun prestó a munchos ciudadanos, qu’amosaron la so disconformidá nes redes sociales.

Dende esti momentu yá ye posible votar nun ‘Conceyu Abiertu’ nuevu. Nesta ocasión queremos conocer la so opinión sobre l’episodiu del Colexu Públicu Buenavista II, con desinformación a los padres pa evitar que matriculen a los sos fíos na materia de Llingua Asturiana y Lliteratura.