Buenavista II: Primer casu esti cursu d'un centru públicu que desinforma sobre l'asignatura d'asturianu

Ta acabante d'empezar la campaña de matriculación en Primaria, que va allargase hasta'l día 21, y yá se conoz el primer casu de manipulación a les families por parte de direiciones de centros educativos. Ye'l casu del uviedín Colexu Públicu Buenavista II.

Nuna carta fechada'l día 8, la direición del centru esplica énte "les duldes posibles por falta d'información" dellos aspeutos sobre la escoyeta ente Llingua Asturiana y Lliteratura y Cultura Asturiana, en dellos casos con mentires y n'otros con afirmaciones que faen por predisponer a les families contra l'asignatura, por exemplu cuando esclaria que'l centru ta obligáu a ufiertar l'asignatura.

Asina'l comunicáu, tres remarcar que l'asignatura d'asturianu ye "voluntaria" y la ufierta "obligatoria pal centru" afirma, que "pa que'l so enseñu pueda impartise nel ciclu ha de ser demandada por un númberu igual o superior a 10 alumnos por ciclu", cuando la ratio mínima foi eliminada por sentencia del Tribunal Supremu nel 2012.

D'igual forma, especifica a los padres que "l'horariu d'estes materies detráese fundamentalmente del tiempu asignáu a les árees llingüístiques y de Conocimientu del Mediu", nun intentu claru de facer ver que l'asignatura d'asturianu quita tiempu pa otres materies, cuando  tien como alternativa la de Cultura Asturiana.

Tolos años existen denuncies de comunicaciones d'esti tipu en centros sobremanera concertaos, y tamién dellos públicos, coles que se fai por desinformar a les families y que l'asignatura d'asturianu tenga una matriculación mínima o mesmamente nun llegue a impartise por falta de matriculaciones.

Dende Asturies.com animamos a los nuesos llectores que nel casu de conocer episodios similares nos faigan avisu d'ellos al traviés del nuesu corréu electrónicu redaccion@asturies.com o nes nueses cuentes en redes sociales pa echar voz y esparder les denuncies.