LaKadarma presenta'l so primer discu con una espicha-conciertu

El día caberu p'acutar plaza ye'l domingu.

La Banda de Gaites LaKadarma celebrará'l vienres viniente la presentación del so primer trabayu discográficu, un EP nel que l’agrupación naveta fai un percorríu per dalgunes de les pieces que resumen la evolución de la formación mientres los sos cuatro años d’esistencia y que representen l’eclécticu soníu 'kadármicu'. Amás de la clásica formación de la banda –compuesta por una seición de gaites en do y sol, y un cuerpu de percusión que consta de caxes d’alta tensión, timbales y bombu–, LaKadarma ta acompañada nel discu por dellos collacios que yá vienen collaborando nos caberos años nos sos espectáculos en direuto, como ye’l casu del navetu Juanjo Díaz, a les percusiones; el gaiteru mexicanu Ernesto Góngora, cola gaita escocesa; y los grupos bretones Alambig Elektrik y L’Usine à Canards.

El conciertu-espicha de presentación va entamar les 21.30 hores nel Llagar Estrada de Nava, con un preciu d'entrada de 15 euros –de 7,5 pa los neños y neñes menores de 12 años–, eventu nel que tamién va actuar el grupu Salón Bombñe. Les persones que quieran asistir han de contautar con La Kadarma al traviés de los númberos de contautu 628.240.388 y 610.088.898, o del corréu electrónicu lakadarma@gmail.com. Nesti casu, hai que detallar el nome, el númberu d'entraes que se necesiten y un teléfonu.

La reserva deberá formalizase enantes del domingu, pudiendo mercar les entraes el mesmu domingu, n'horariu de 21 a 22 hores, nel Bar Florida de Nava.