Los neños de Siero medren n'asturianu

"La Conceyala d'Educación, Cultura y Deportes del Conceyu Siero presentó esti martes 29 d'abril les dos nueves campañes entamaes pol Serviciu de Normalización Llingüística del conceyu. Nesti casu trátase de dos campañes complementaries empobinaes a los neños y neñes del conceyu, concretamente a la población acabante de nacer, ""El llibru del naciatu"", y a la que s'asitia ente los 0 y los 3 años, ""medrando n'asturianu"".

L'oxetivu ye trabayar por evitar que se ruempa la tresmisión xeneracional de la llingua y la cultura asturianes.

Según el responsable del Serviciu de Normalización Llingüística de Siero, Xosé Firmu García Cosío, ""ye evidente que los guah.es en Siero falen menos asturianu que los sos pás; ye fácil comprobar cómo éstos, cuando se dirixen a los fíos, usen un rexistru más castellanu. Pero la preparación pal sieglu XXI y l'aprendimientu d'idiomes nun tien por qué suponer arrenunciar al patrimoniu propiu, a esi asturianu que sentimos en casa y que mos recuerda les coses más entrañables de la infancia"".

Con esti mensaxe, la campaña Medrando n'Asturianu, editada en comuña col Serviciu de Normalización de la Comarca la Sidra, Mancomunidá del Cabu Peñes, conceyu de L.lena y Samartín del Rei Aurelio; sigue'l llabor entamáu pola Oficina Municipal de la Llingua del Ayuntamientu de Xixón y el Serviciu de Normalización Llingüística de Llangréu, editando una serie de materiales pa la reciella, ente los que s'atoparíen: 400 carpetes troquelaes a tou color pa guardar el restu d'elementos y con xuegos pa que los pás enrieden colos más pequeños; 400 pegatines pal coche col eslogan ""Cuidadín que voi dientro""; 400 fiches con pallabreru y el testu d'una añada de Nacho Fonseca; mididores de l'altura del guah.e o la guah.a y 400 baberos con vocabulariu.

D'otru llau El llibru del Naciatu pretende rexistrar los avances del neñu o neña dende que naz y hasta los 3 años, cuntándose pal repartu cola collaboración de les escueles de 0 a 3 años y les matrones del conceyu de Siero. Nesti casu hai editaos 200 exemplares que puen tamién consiguise na Conceyalía d'Educación, Cultura y Deportes o nel Serviciu de Normalización Llingüística del Conceyu Siero."